Komîteya Têkilîyanê Teberî ya KCKyî Demhat Agît (Seyîtxan Ayaz) û endamê Komîteya Weşîye Cemîl Amed (Eser Irmak) bi eşkerayîyêke yad kerdî.

Eşkerayîya KCKyî wina ya:

''Endamê Komîteya Têkilîyanê Teberî ya KCKyî Demhat Agît û endamê Komîteya Weşîye Cemîl Amed bi hawayêkê fermîyî Başûrê Kurdîstanî de wezîfedar bîyî. Wird embazê ma zî 15ê teşrîna verêne ya 2019î de Silêmanî de hetê teyarayanê şerî yê bêmerdiman ê dewleta tirke ya faşîste ra ameyî qetilkerdene. Bi na wesîle ma embazanê xo yê ercîyaye, çêr, fedakar û rûmetênan serrgêra yewîne ya şehadetê înan de bi rêzdarî û minetî yad kenê. Ma do têkoşînê seba Kurdîstanê azadî ser bivisnê û bi nê hawayî wayîrê vîrameyîşê înan vejîyê.

Artêşa tirke ya faşîste 9ê teşrîna verêne ya 2019î de hêrişê Serêkanîyê û Girê Sipî kerd. Nê hêrişî bi destûrê DYA ameyî kerdene. Hêzanê emperyalîstan û netew-dewletan herême de hêrişê dewleta tirke xebitnayî ke Şorişê Rojawanî tasfîye bikerê. Dewleta tirke ya faşîste hema zî hêrişanê xo dewam kena. 

Wextê îşxalê Serêkanîyê û Girê Sipî de wird  embazê ma yê welatperwerî hetê hîşmendîya xayîne û ajanan ra ameyî qetilkerdene. Rixmê naye zî Hukmatê Başûrê Kurdîstanî cewab nêda ke kamî paştî daye qirkerdişê Demhat û Cemîlî. Ma reyna danê zanayene ke keyeyê înan, embazê ma, şarê ma û têgêrayîşê ma pabeyê roşnîkerdişê nê qirkerdişî yê.

Tay hêzî nê prosesî de zî komelê ma yê êzidîyanê ke vera qirkerdişê DAÎŞî xo ver dayê, îmkananê xopawitiş û xoîdarekerdişî ra kêm verdenê. Hêzê xayîn û ajanî newe ra dewre de yê. PDK û hukmatê Iraqî çinkerdişê destkewteyanê êzidîyan ser o pêkerd. 

Êyê ke bîyî sebebê şehadetê embazanê ma, operasyon û qirkerdişanê vera êzidîyan, êyê nê çîyan teşwîq kenê û hetkarîye kenê ganî hetê şarê ma ra bêrê dîyene û vera înan tewirêk bêro mojnayene.''