Berpirsîyaranê verênan ê Parastinî ra Mihemed Mirza Sindi 23ê temmuze de qezaya Zaxoyî ya bajarê Duhokî yê Başûrê Kurdîstanî de netîceya teqayîşê bombaya ke wesayîtê ci de ameye cakerdene de merd. PDKyî bi destê medyaya xo îdîa kerd ke Mirza Sindi hetê PKKyî ra ameyo kiştene.

HPGyî 29ê temmuze de eşkerayîyêka xo de da zanayene ke qet eleqeyêka înan pê mergê Mirza Sindi çîn a. Derheqê babete de yew eşkerayîye zî Komîteya Tekîlîyanê Teberî ya KCKyî ra ameye. Eşkerayîye wina ya:

''PDK xeylêk rey o binê nameyê Konseya Asayîşî ya Herêma Kurdîstanî de eşkerayîyanê ke raşt nîyê dano. Her dorim bîlasebeb Têgêrayîşê Azadîye yê Kurdîstanî sûcdar keno û sey hedefî mojneno. Rojanê peyênan de PDK hêna binê nameyê Konseya Asayîşî ya Herêma Kurdîstanî de eşkerayîyêka newîye weşenaye û mergê Parastînî Mihemed Mirza Sindiyî ra têgêrayîşê ma sey berpirsîyarê tepişt. Na eşkerayîye hetêkî ra mojna ke senî aqil û wîjdanê şarê kurdî şenik yeno vînayene û hetê bînî ra mojna ke PDK dezgehanê hukmatî yê Herêma Kurdîstanî senî goreyê menfeatê xo şuxulneno.

Şarê kurdî çar parçeyanê Kurdîstan û dinya de derheqê Pêkerdişê Lozanî de munaqeşe keno û tarîxî ra dersan vejeno, PDK hem teberê nê munaqeşeyan de maneno hem zî Metîna û Xakurkê de pîya bi dewleta tirke ya îşxalkere têgêreno. PDK bi nê eşkerayîyanê xo yê ke raşt nîyê, wazeno şarê Kurdîstanî bixapîno û kurdan cêser bifîno.

Bêşik nê çalakîyanê PDKyî ra  feydeyo tewr pîl dewleta tirke ya îşxalkere vînena.  Çunke PDK dezgehanê Herêma Kurdîstanî bitaybetî zî Konseya Asayîşî ya Herêma Kurdîstanî semedê nimitişê sûcanê dewleta tirke û MÎTî şuxulnena. MÎT û Parastin Têgêrayîşê ma sey berpirsîyarê mergê Mihemed Mirza Sindi hesibnenê, çunke waştişê înan oyo ke sûcê qirkerdişî ke MÎTî vera keyeyê Mela Ehmed Celaledînî kerdo, binimnê. Yeno zanayene ke qerarê nê qirkerdişî merkezê MÎTî yê Duhokî de ame girewtene.

Senî ke HPGyî zî eşkerayîya xo de vat; eleqeya Têgêrayîşê ma pê mergê Mihemed Mirza Sindi çîn a. Bingehê nê îdîayan çîn o. Goreyê ma mergê Mihemed Mirzayî seba ke sûcê ke vera şarê kurdî bîyî wa merê eşkerakerdene, netîceya yewbînan ra hesapbersayîşî yê mabênê PDK û Parastinî de qewimîya. PDK û Parastin Şingalî ra heta Metîna û Zaxo pîya bi MÎTê tirkî yê terorîstî têgêreno. Nê semedî ra xeylêk şorişgêr û welatperwerî ameyî qetilkerdene.

Ma veng danê ke vera nê tewirê PDKyî ke wazeno kurdan biverdo pê, wa şarê kurdî, heme dezgeh û sazgehê Herêma Kurdîstanî, roşnvîr, hetkarê azadîye û Iraq bibê hîsgêr.  Dewleta tirke kena ke bi destê PDKyî dezgehanê fermîyan ê Herêma Kurdîstanî bifîno dest û vera şarê kurdî şerê taybetî bido rayraberdene. Ganî destûrê nê medîyo.''