Komîteya Têkilîyanê Teberî ya KCKyî bi eşkerayîyêke derheqê planê neweyî yê îşxalkerîye de hişyar kerd. Eşkerayîye wina ya:

''Hêrişê dewleta tirke ya îşxalkere de Koyê Sîyarî yê dewa Kafya de di hemwelatîyê Başûrî yê bi nameyê Beşîr Umer Elî û Arif Teha şehîd bîyî. Ma sere de keyeyanê înan rê pêro şarê Kurdîstanî rê serweşîye wazenê. Nê hêrişî mojnenê ke dewleta tirke dişmena pêro kurdan a û wazena pêro kurdan qetil bikera.

Hêrişanê dewleta îşxalkere ra Başûr de  heta nika bi hezaran dewî ameyî xalîkerdene û wêrankerdene, bi seyan hemwelatîyî şehîd û birîndar bîyî. Ancî netîceya hêrişanê kîmyewîyan ê dewleta tirke de bi seyan gerîlayî şejîd bîyî. Bi destê dewleta tirke nê hêrişê kîmyewîyî Enfalêko newe yeno amadekerdene. Hetê bînî ra PDK nêverdeno ke vera nê hêrişan tewirêko welatperwer bêro mojnayene û verê qirkerdişî bigêrîyo. PDK Enfalêkê neweyî kurdan rê ferz keno. Wextê nê hêrişan de PDK serê xalîyanê sûran de selahîyetdaranê dewleta tirke pêşwazî keno û nînan de pozan dano.

Dewleta tirke ya faşîste bi serekîya Erdogan û Bahçelîyî planêkê îşxalî yê newe û hîrayî vera Kurdîstanî kena. Zîyaretê Bexdad û Hewlêrî yê wezîranê tirkan zî amadekarîyê nê planî yê. PDK wazeno ke dewleta Iraqî zî kaş bikero hemkarîkerdişê dewleta tirke. Coka ma venga pêro hêz û terefanê Başûrê Kurdîstanî û dewleta Iraqî danê ke verê nê hêriş û qirkerdişan tewirê xo bigêrê û meverdê ke hinî gonîya hemwelatîyan birijîya.

Ma ancî şarê Başûrî rê serweşîye wazenê û birîndaran rê şîfaya xeyrîne wazenê. Ma soz danê ke ma do serê rayîrê şehîd Helmet Dêralukî de vera faşîzm, îşxal û hemkarîye têkoşîn bikerê û qesasê şehîdan bigêrê.''