Hemserekîya Konseya Rayberdişî ya KCKyî bi wesîleya Qirkerdişê Gelîyê Zîlane yo ke 1930 de ame kerdene eşekrayîye daye û nê pare kerdî:

“Qirkerdişê Gelîyê Zîlane de sey qirkerdişanê ke dima ra Dêrsim de qewimîyayî, dewleta tirke karekterê xo yê qirker û dişmenê kurdan fîna çîman ver. Wextê qirkerdişî de tewir û vatişê  dezgehanê dewlete û selahîyetdaranê ci mojna ke peyê qirkerdişî de senî yew zîhnîyet est o. Dewlete eşkera vat teberê tirkan de do heq û huqûqê kesanê bînan nêro naskerdene. Qirkerdişê Gelîyê Zîlane zî sey qirkerdişanê bînan semedê çînkerdişê kurdan û Kurdîstanî ame kerdene. Seba ke şarê kurdî welat, ziwan, kultur, nasnameyê xo, bi qala kilmê kurtîdîtîya xo canêverda raştê qirkerdişan ame.

No zîniyeto ke wazeno kurdan çîn bikero ewro zî hetê îqtîdarê AKP-MHPyî ra yeno domnayene. Sey verî ewro zî wazenê ke wa kurdî nasnameyê xo ra bêrê raqilnayene.  Kurdê ke nê qebul nêkenê, wayîrê estbîyayîş, îrade û azadîye xo vejîyenê, vera înan polîtîkaya qirkerdişî yena rayraberdene. Heme hêriş û şarê nê îqtîdarê faşîstî nê semedî ra yê.

 Tecrîdê serê Rayber Apoyî, qirkerdişê ke bi destê DAÎŞî ameyî kerdene, qirkerdişê êzidîyan, hêrişê vera Rojawanî, hêrişê kîmyewîyî yê vera gerîlayan, hêrişê vera Mexmûr, operasyonê qirkerdişî yê vera sîyasetê demokratîkî yê Vakurê Kurdîstanî û Tirkîya,  hêriş û zextî yê  serê şarî, şero taybet û polîtîkayê suîqastî yê ke semedê îmhayî her ca de yenê kerdene netîceya na polîtîka ya. Bêşik senî ke tarîx de ame kerdene ewro zî qirkerî nê hêrişan bi paştdayîşê xayînanê kurdan kenê. Kurdê  ke semedê menfeatê xo cayê dewlete û îqtîdarî de vindenê semedê şarê kurdî xayîn ê.

Sere de Qirkerdişê Gelîyê Zîlane gerek heme qirkerdişan ser o bêro vindertene û bêrê roşnkerdene. Tirkîya de heta ke raştîya kurdan dir nêro têrî, têkoşînê azadîye yê kurdan nêro wayîrvejîyayene do qet averşîyayîşêk mebo. Gerek vera neheqîye û qirkerdişanê vera kurdan tewir bêro girewtene. Gerek roşnvîr û şarê Tirkîya zî vera na neheqîye vengê xo berz bikero.

Ma reyna qûrbananê Qirkerdişê Gelîyê Zîlane bihurmet yad kenê, ma do miheqeq kiştoxan û hemkaranê înan ra hesab bipersê û cuya azad û demokratîke înşa bikerê. Na çarçewe de sere şarê ma yo welatperwer heme dostî û hêzê demokrasîyî gerek vera nê îqtîdarê qirkerî û hêrişanê ci yê tecrîd û qirkerdişî têkoşînî xurtêr bikerê."