Komîteya Şaran û Bawerîyan a KCKyî seba rayberê dînî yê êzidîyan Bavê Şêxî mesajê serweşîye weşanîya.

Mesajê Komîte wina yo:

''Ma pê hesîya ke rayberê pîlî yê dînî yê êzidîyan Bavê Şêxî şîyo rehm. Ma pê na xebere zaf bîyî xemgîn. No wefat seba êzidîyan û kurdanê welatperweran dejêko pîl o. Ma sere de keyeyê Bavê Şêxî rê pêro êzidîyan rê serweşîye wazenê. Ma înan rê sebir wazenê. Ma pê bawer ê ke êzidîyî do bi caardişê yewîya xo û bihêzkerdişê dezgehanê xo do cewab bidê vîrardişê Bavê Şêxî.

Mertebeyê Bavê Şêxî mertebeyo tewr pîl ê tarîxê êzidîyan o. Nê mertbeyî êzidîyî qirkerdişan û fermanan ra pawitê. Coka êzidîyî deyndarê  dezgehê Bavê Şêxî û temsîlkaranê ci yê. Bavê Şêxî kultur, hîşmendî û tewirê xopawitişî zî temsîl kerdî. Ma pê bawer ê ke êzidîyî do seba xopawitişê xo dezgehan awan bikerê û bi nê hawayî wayîrê vîrameyîşê Bavê Şêxî vejîyê.

Bavê Şêxî tewr zaf yewîya êzidîyan waştêne. Ey êzidîyan rê vatêne ke vera hêrişan bi hêzkerdişê rêxistinbîyayîşê xo, xo bipawê. Bavê Şêxî waştêne ke êzidîyî abigêrê erdê xo ser.

Cuya xoser û demokratîke ya ke armanc û hedefê êzidîyan bibî, ewro game bi game Şingal de yena caardene. Seba naye xoverdayîş dewam keno. Bavê Şêxî destûr dabi ke cinîyê ke bibî esîrê DAÎŞî newe ra komel de bêrê qebulkerdene. Nê tewirê modernî yê Bavê Şêxî rojanê tewr zehmetan de moraş û destek dabî êzidîyan û seba çareserîya meseleyan berî akerdbî. Tewirê winasênî yê Bavê Şêxî mîyanê êzidîyan de otorîteyê ey zî kerd bihêzêr.

Êzidîyî fermanê peyênî ra dima bi hawayêkê lezî ameyî xo ser. Naye de rolê Bavê Şêxî pîl o. Bavê Şêxî têna seba êzidîyan nê seba pêro kurdan rayberêko bêhempa bi. 

Ma reyna keyeyê Bavê Şêxî û êzidîyan rê serweşîye wazenê. Ma eşkenê bi caardişê yewîya xo û awankerdişê sîstemê xoserê demokratîkî Bavê Şêxê rehmetî tim bîyarê xo vîrî.''