Hemserekîya Konseya Rayberdişî ya KCKyî derheqê vengdayîşê hunermend û roşnvîran ê yewîya neteweyîye û kongreya neteweyîye de eşkerayîyêk daye.

Eşkerayîya KCKyî de nê ameyî vatene:

‘‘Hunermend û ronşvîrê ke vervatoxê wîjdan û hîsanê şarî yê wayîrê rojdemê yewîya kurdan vejîyayî. Na gamêka muhîme ya. Tarîxî ra waştişê şarî verî hunermend û roşnvîrî anê ziwan û seba ke wayîrê nê waştişan bivejîyê bedelan danê. Hunermend û roşnvîrê kurdan zî erwo berpirsîyarîya xo bica anê. Şarê kurdî yewîya neteweyîye wazeno. Seba ke partîye sîyasîyî û hêzê kurdan nê waştişê şarî nêanê ca têkoşînê azadîye û demokrasîyî yê kurdan  derbe geno. Dişmenê kurdan tewr zaf tîya ra danê kurdan ro û serdestîya xo domnenê. La seke filozofêkî vato êye ke deyîran virazenê hêzê înan êyê ke qanûn virazenê ra zafêr o. Ma no reyna bi wayîrvejîyayîşê yewîya neteweyîye û kongraya neteweyî yê hunermend û roşnvîranê kurdan dî. Nê wayîrvejîyayîşî babete arde merhaleyêka neweye. Nika wina yew rojdem esto. Nê semedî ra ma êyê ke kombîyayîş, rayraşîyayîş û konserê Lozanî kerdî, silam kenê. Rayraşîyayîşê 7ê kanûne yê yewîya neteweyîye zî do na game hîna pît bikerê. Ma amadekar û tewrbîyayoxanê nê rayraşîyayîşî zî silam kenê. seba yewîya neteweyîye û kongreya neteweyîye ganî heme partî û hêzê kurdan rolê xo kay bikerê. Ma bawer kenê ke xebatê yewîye û kongreya neteweyîye yê ke serra 2013 de ameyî destpêkerdene do demê ma ya verî de miheqeq ser bikewê.‘‘