Aydin Kaya 6ê Hezîrana 2012î de Zîndanê Mûşî de wefat kerdibi. Kerraya gorê ey bi nuşteyê "Ma do to xo vîr a nêkê embaz" 29ê teşrîna verêne bi fermanê dozgerîye hetê leşkeran ra amebî şiknayene û berdene.

Kekê Aydinî Huseyîn Kayayî îfade kerd ke berpisîyara mergê Aydinî dewlet a. Huseyîn Kayayî vat: "13 çeleyê 2012î de birayê mi bi neheqî ame tepiştene. Aydin 3 rojî qeraqol  de amebi vindertene. Uca de serdî ra bîyo nêweş. Dima hetê mehkeme ra amebi tepiştene û berdene bi Zîndanê Muşî û 6ê hezîrane de wefat kerd. Seba ke zîndan de tedawîyê birayê mi bi hawayêkê başî nêame kerdene wefat kerd. Ma derheqê ney de muracat kerd la semedo ke sucdar nêame dîyene tehqîqat qedîya. Hûrmetê înan bi goranê ma çin o la pê şiknayîşê kerraya gorî çîyêk nêkeweno destê înan. Aydin bi neheqî ame tepiştene û zîndan de wefat kerd. Nika zî kerraya gorê ey ameye şiknayene. Destê mi ra çîyêk nêno."

Wekîlê Mûşî  Mensur Işikî zî vat:  "Dewlete bi xebatanê xo yê kurdkî vana ke 'Şima ziwanê xo binê sînoro ke hetê mi ra ame qetîkerdene bixebitnê. Tehamulê înan bi kurdkî çin o. Ma seba nê serebûtî pêşnîyazê persî da meclîsî ke ma hema cewabê ci nêgirewt. Ma do na yewe taqîb bikê."