Dr. Kendal Amanos mîyanê keyeyêkê Kurdî de ame dinya, ke Riha ra bar kerdo bi Osmanîye. Dr. Amanos gama ke Unîversîteya Gazîosmanpaşa de perwerdeyê Beşê Tibî gêno, mucadeleyê Azadîya Kurdan nas keno. Dereceya hişmendîye ya ke bi wendişê kitabanê Rayberê Şarê Kurdî Abdullah Ocalanî berz bena, verê ê dana bi koyanê Kurdistanî. 

Ma Kendal Amanosî dir derheqê tecrubeyê êyê ameyîşê bi koyanê Kurdistanî qisey kerd, ma derheqê çîyanê ke doktorîye de keno, ciwîyeno û derheqê xoverdayîşê tarîxî yê Xakurkê de qisey kerd.

Çira Ko

Dr. Kendal Amanos gama ke Fakulteya Tibî wandêne mucadeleyê azadîya Kurdistanî nas nêkerdêne, derheqê tewrbîyayîşê xo yê mîyanê refanê gerîlayan de vano, “Her çend mi erey Rayberîye nas kerde û erey pawitişê Rayberîye wendî zî çîyê ke mi rastîya Kurdan dir girê dayêne her ke şîyênê bîyêne hîna bîyêne xurt. Serra peyêne ya unîversîte de seba ke ez sîstemê mewcûdî ra xelesîyaya, derheqê çîyanê ke Kurdan ser o yenê bicaardene de bîya zelale. Mi çiqas pawitişê Rayberîye wendî, mi keşf kerd ke rastîyê ke ez ci rê gêrena, tîya yê. Na çarçewa de hemverê zor, çetinî û zextê zêdeyî de mi qerar da ke ez tewrê refanê PKK’yî bibî. Do rayîro tewr rast bibîyêne ke mi mucadele wareyanê cîyayan de, mîyanê gerîlayan de, koyanê Kurdistanî de bidayêne.”

Hîsê Doktorîye yê Gerîlayî Mîyan de

Derheqê hîsanê xo yê ke gama koyan de, wareyanê şerî de doktorîye keno Amanosî vat, “Embazê ke ma tim pîya yê û heman wareyî pare kenê, verê ma de birîndar benê. Mudaxeleyê nê hevalan rê hîs û hêzêko bîn lazim o. Merdim keno ke bi hîsî tê nêgêro. Helbet şertanê çetinan de, wareyanê sey Xakurkê de ke şer giran o, merdim bibo cewab muhîm o. Gama ke ez nê doran de tedawî kena, vînena ke şa benê no seba mi hîsêko cîya yo. Şahidîya mucadeleyî, payan ser o mendiş o, bê dubendîyêk rayra şîyayîş o, nê benê sebeb ke merdim hêz bido na qehremanîya ke yena ramotene.”

Sîstemê Weşîye û Prosesê Tedawî

Gerîla Dr. Amanos derheqê çetinîyanê doktorîya gerîlayan de vano, “Bajar de çîyo ke yeno kerdene çi yo? Hetkarîya ewilêne nêweşan rê yena kerdene û neqlê nêweşxaneyêkê tam û pirrî ke îmkan û wasitayê ci tam ê yenê kerdene. Şertanê ma de no mumkun nêyo. Hîna zaf, şertanê koyan de, şertanê erazî de, bi sîstemê hewilnayîşî cehd yeno kerdene ke embazê birîndarî yan zî nêweşî bêrê tedawîkerdene. Merdim tîya zano ke dişmeno tewr pîl dem û şerrt ê û goreyê naye kes cehd keno ke tedawîya tewr rinde bikero.

Nê heme xebatî hetê komîte û yewîyanê weşîye ra, ke ma ê organîze kerdê, yenê rayraberdene. Heman wextî de akademîyêka ma ya bi nameyê M. Hayrî Dûrmûşî esta ke ma xebatanê perwerdeyî ûca danê, bi îmkananê xo embazanê xo yê doktoran dir ma şertanê koyî de na akademî awan kerda. Na çarçewa de ganî ma wayîrê tewirêkê mîlîtanîyî bibê ke organîzebîyayîşê xo wina kerdo. Bi na hişmendîye ma kenê ke ê xebatan rayra berê.”

Doktor gerîla Amanos ano ziwan ke heta nika înan Doktoranê Sînornenasan ra tu hetkarî û destek nêgirewto. Derheqê mudaxeleyê leşkeranê Tirkan ê serê cenazeyanê gerîlayan de zî Amanos vano, “Helbet, no xerepîyayîşê zihnî û ruhî yo û nêweşîyêk a.”

 ‘Bêvengî Hemparî ya’

Amanos wina veng dano doktoran: “Nasnameyê doktoran o etnîk çino. Ganî xusûsîyeto sereke yê doktoran wijdanê înan bo. Na yewe ra zî vengdayîşê mi heme doktoran rê na ya: hemverê hişmendîya ke Rojakewtena Mîyanêne de, xusûsen zî coxrafyaya Kurdistanî de sûcê merdimîye keno, bêveng memanê. Bêvengî hemparî ya.”

‘Şarê Başûrî Ganî Domananê Xo yê Fedaîyan rê Wayîr Vejîyo’

Derheqê têgêrayîşê îşxalkarî yê dewleta Tirkî de zî Dr. Amanos vano, “No teşebusê îşxalkarîye tena wareyêk ser o nêyo, konseptê hêrişê pêroyî yo, Rojawan rah eta Başûr, Rojakewtene yeno waştene ke bêrê îşxalkerdene, seba nê îşxalî zî dewleta Tirkî her çîyê xo seferber kerdo. Gerîla xoverdayîşêkê pîlî ramojneno, wayîrê tewirêkê fedaî yo û do nê hêrişî bêrê şikitene. Xusûsen şarê ma yê Başûrê Kurdistanî, ganî rin bizano ke hemverê teşebusê îşxalî de tewiro tewr muhîm o yo ke merdim xeta îxanetî rê xizmet nêkero û domananê xo yê fedakaran rê wayîr vejîyo.”