Wezîrê Pawitişî yê Tirkîya Hulusî Akar û Serekê Fermandarîya Pêroyî ya Artêşe Yaşar Gulerî vizêr Iraq zîyaret  kerd. Akaî qaşo 13ê tebaxa 2020î de Iraq zîyaret bikerdêne la dima ke bombardumanê artêşa tirke de di leşkerê payeberzî yê Iraqî merdî Akarî o zîyaret betal kerdbi.

Zîyaretê Akarî ra dima Kerkûk de cerganê ke hetê MÎTî ra perwerde benê dest pê tatbîqatan kerd. Cergan serkêşîya Serekê Cepheyê Tirkmenan Salîhî de 'hêzê xo' mojna û tatbîqatê leşkerîyî kerdî.

Cergê Tirkîya herêma Taze û qezaya Daqûqî ya Başûrê Kerkûkî û qezaya Tilaferî de ameyî cakerdene. Goreyê nînan Mûsil û Kerkûk parçeyê Tirkîya yê û ê zî xîret kenê ke nê şaristanan bikerê binê kontrolê Tirkîya.

16ê teşrîna verêne ya 2017î ra nata dewleta tirke rayîr nêdana ke hêzê kurdî nê şaristanan de ca bibê la cergê Tirkîya tede eşkenê tatbîqatan bikerê.