Gerîlayê HPGyî Seyîtxan Acay 30ê temmuza 2020î de Koyê Gabarî yê Şirnexî de hêrişê hewayî de 2 embazanê xo reyde şehîd bi.

Cenazayê gerîlayan wedarîyayî morgê Nêweşxaneyê Dewlete yê Şirnexî. Keyeyê Acayî seba ke cenaza bigêro muracatê serdozgerîye kerd. Seba ke cenaza parçe bi parçe bibî keye nêeşka cenazaya xo teşhîs bikero. Coka keyeyî seba testê DNA gonîye daye û netîceya ci pawite. Ê mîyanî de cenaza goristanê bêkesan ê Şirnexî de ameyî definkerdene. 

Keyeyê Acayî numûneya DNA ra 3 mengan dima eşnawit ke gonîye hema zî nêerşawîyaye Dezgehê Tipê Edlîyî. Keyeyî rê ame vatene ke seba ke dozger tayîn bi numûne nêerşawîyo û ganî keye pabeyê dozgerê neweyî bibo.  Dozgerê neweyî peynîya teşrîna verêne de numûne erşawite Dezgehê Tipê Edlîyî. Rixmo ke serî ra 123 rojî derbaz bîyî cenazaya Seyîtxanî hema zî teslîmê keyeyê ci nêbîye. 

Dadîya Seyîtxan Acayî Rûkîye Acay şehadetê lajê xo ra nata kincanê sîyayan dana xo ra û şîn gêna. Dayîke Rûkîye da zanayene ke heta ke a cenazaya lajê xo nêgêra şînê xo nêqedînena. Dayîke Rûkîye vat: ''Mi morg de lajê xo nêşinasna, cenazaya ci lete bi lete bibî. Seba ke cenazaya lajê xo bigêra mi zaf xo ver da û ez do bida. Dozgerî ma rê vat 'Dine mengan vinderê.' 2 nê 4 mengî derbaz bîyî la cenazaya lajê mi nêdanê. Cigêrê mi vêşeno. Ez dadî ya. Ez wazena lajê xo defin bikera, serê gorê ci de dûayan bikera. Ez dawaya heqê xo kena. Wina yew qanûn dinya de kamca de esto? 4 mengî û 11 rojî yo ke lajê mi dinyaya xo bedilnaye.''

Dayîke Rûkîye ard ziwan ke ê hema zî cenazaya xo pawenê û vat: ''Key ez cenazaya lajê xo bigêra o çax ez do peynîya şînê xo bîyara û kincanê sîyayan xo ra bikera. Heqê çewî çin o ke ma rê wina ezîyet bikero. Ez têna cenazaya lajê xo wazena.''