Çalakîyê grevê vêşanîye yê ke hemverê tecrîdkerdişê Rayberê Şarê Kurdî Abdullah Ocalanî bi serkêşîya hemsereka KCD’yî Leyla Guvene dest pêkerdî, çar hetanê dinya de dewam kenê. 30’ê Nîsane ra tepîya 15 tepişteyê ke grevê vêşanîye de bîyî, dest bi rojeyê mergî kerd.

Xoverdayoxanê rojeyê mergî ra yew zî Abdulhalik Kaplan o ke Zîndanê Amedî yê Tîpê D’yî de yo. Kaplan qezaya Licê ya Amedî ra yo û mekteba ewilêne, mîyanêne û lîse Licê de wenda. Kaplano ke pîyê ci karmend o, serra 2006 de pîya bi keyeyê xo bar keno merkezê Amedî. Serra 2014 de wextê hêrişanê DAÎŞ’î yê hemverê Kobanê de ravêreno Rojawan. Rojawan de birîndar beno û gama ke seba tedawî agêreno Amed yeno tepiştene.

‘Tim bi Sereyê Xo Têgêrayêne’

Ma û pîyê xoverdayoxê rojeyê mergî Abdulhalik Kaplanî derheqê xoverdayîşê lajê xo de ANF’yî rê qisey kerd. Pî Nîzamettîn Kaplanî vat lajê ê Abdulhalik domanîya xo de ciraameye û xebatkar bi û vat, “Tim bi sereyê xo têgêrayêne. Nêwaştêne ke kesek serê sereyê ê de bibo. La embazanê xo ra zî xeylî hes kerdêne. Embazanê ê zî ê ra xeylî hes kerdêne. Ê çew nêdejnayêne. Mabêna ê û dorê ci de têkilîyê ê xeylî xurtî bî. Domanîya ci ra heta ewro ez qe ci ra aciz nêbîya.”

Kobanê de Birîndar bi

Kaplanî ard ziwan ke gama hêrişanê îşxalkerdişê Kobanê de sey her ciwanêkê Kurdî lajê ê zî şîyo Kobanê û vat, “Bi îradeyê xo qerar da. Ma zî qerarê ci rê hurmet ramot. Ûca şer de birîndar bi û seba tedawî ame Amed. Heman serre de ame tepiştene. Bêguman sey her maye û pîyî ma lajê xo dir ê. Verê çimanê dewlete de o sûcdar bo zî verê çimanê ma de sûcdar nêyo.

Ma her hewte şinê pêvînayîşê ê. Ma embazanê ê zî pêvînayîşê akerdeyî de vînenê. Ma vînenê ke embazê ê ê ra xeylî hes kenê… Ma bi nê serberz ê. Têkilîya embazîye de samîmî û durust o.”

‘Me Qerarê ci rê Hurmet Ramot’

Kaplanî vat gama ke lajê ê Abdulhalikî qerar dayo ke bikewo grevê vêşanîye, înan qerarê ci rê hurmet ramoto û vat, “Bi zerrîya ma nêbo zî ma qerarê ci rê hurmet ramot û paştî daye ê. Ewro roja 59’ine ya çalakîya ê ya. 30’ê Nîsane ra nata zî rojeyê mergî de yo. Qerarê xo yê rojeyê mergî bi rayîrê telefonê mi ra vat û mi zî ci ra vat ez paştî dana to.

30’ê Nîsane heman wextî de rojbîyayîşê Abdulhalikî yo. Hendî tesaduf yan tesaduf nêyo nêzana, labelê rojbîyayîşê xo de kewt rojeyê mergî. Lajê mi seba qedîyayîşê tecrîdbîyayîşê Rayberê Şarê Kurdî Abdullah Ocalanî bedene xo dayo verê rojeyê mergî. Ez veng dana partîyanê sîyasîyan, organîzasyonanê cimatkî yê sivîlan û her kesanê ke wayîrê wijdanî yê û veng dana şarê Kurdî; Ma bibê vengê nê tepişteyan û derdanê înan pare bikerê. Gureyê merdiman pawitişê cuye yo.”

‘Waştişê Înan Waştişê ke Nêrê Qebûlkerdene Nêyê’

Kaplanî bala ante eke cayêk de edalet çinbo ci ra bendewarîye zî nêbena û vat, “Welatêk de ganî edalet seba her kesî seypê bo. Serekkomarî ra heta şiwaneyêk ganî edalet seba her kesî seypê bo. Ma wazenê ke tecrîdo giran biqedîyo. Vero ke zîndanan de merdimî cuya xo vînî bikerê, ganî no proses biqedîyo. Lajê mi qasê 8-9 kîlo dayo. Eke ez seba lajê xo vajî 60 rojî tay nêyo. Tena bi şimitişî beden nêeşkeno payan ser o bimano.”

Dimayo ke înan 60 rojî bedene xo da verê grevê vêşanîye nika zî kewtî rojeyê mergî. Ma nê halî wijdanê ê kesanê ke tecrîdî ferz kenê rê verdanê. Ma wazenê vero ke domanê ma bimirê, vero ke mayî bibermê waştişê înan bêrê qebûlkerdene. Xora waştişê înan zî waştişê ke nêrê qebûlkerdene nêyê. Wazenê rayberê şarêk ke 20 serrî yo girawêk de zîndan de yo bieşko keye û avûkatanê xo bivîno. Heqê êyê huqûqîyî û qanûnîyî estê. Ganî bêrê bicaardene.”

‘Ganî Dewlete Game Bierzo’

Maye Aysel Kaplane zî Leyla Guvene silam kerde û vat, “Êyê ke nê welatî de yê, çi Kurd, çi Tirk; seba qedîyayîşê grevê vêşanîye ganî mesuldarîye tê bigêrê. Gama ke ez lajê xo ra persena ke ‘senîn ê,’ vano halê mi rind o. Ma vizêr şîyî pêvînayîşê ê. Lewê ê bîbî sipî. Mi embazê ê zî dîyî, heme bêhal bî. Ma dewlete ra wazenê ke na babete de game bierzo. Çunke ma nêwazenê domanê ma bimirê.”