Koordînasyonê KJKyî bi wesîleya serrgêra Komployê 15ê Sibate yê vera Rayberê Şarê Kurdî Abdullah Ocalanî eşkerayîyêke daye.

Eşkerayîye wina ya:

''Rayber Apo şexsîyetêko tarîxî yo ke vera serdestîya camêrdan a 5000 hezar serre vindert, pêro rindîyî kesayetê xo de ardî pêser. Ma pê na raştîye Komployê Mîyanneteweyî şermezar kenê. Rayberîya Serek Apoyî de qetî cinîyî û şarî do ser bikewê.

Ma tewirê Rayber Apoyî yê vera sîstemê îşkenceyî yê Îmraliyî rê selam kenê. Ma şehîdanê 'Şima nêeşkenê tîja ma tarî ma bikerê' bi rêzdarî û minetî yad kenê. Hêzê komplogêrê ke şexsê Rayber Apoyî de pêro kurdan rê tecrîd ferz kerd qetî do vera  xoverdayîşê bêhempayî bin bikewê. Tewirê nê xoverdayîşî do Rayber Apo azad bikerê.

Komployê 15ê Sibate  hêrişê sîstemê dewlet-îqtîdarî yê vera alternatîfê xo bi.  Meseleya azadîya cinîyan hetê Rayber Apoyî ra ameye eşkerakerdene û resaye îmkan û hacetanê têkoşînî. Coka hêzanê komplogeran verî vera tewir û embazîya Rayber Apoyî yê seba cinîyan xo rêxistin kerd. Komployê 15ê Sibate têna vera cinîyan ê kurdan nê cinîyanê pêro dinya ame kerdene. Coka nêrazîbîyayîşê cinîyan ê vera komployî nêrazîbîyayîşê vera sîstemê camêrdan û kulturê tecawuzî yo.

Kurdê ke Rayber Apoyî ra dima firsendê estbîyayîşî û azadîye dî, komployî ra dima reyna maruzê qirkerdişî bîyî.  Komployê 15ê Sibate qirkerdişê pêro kurdan kerd armanc. Semedo ke Şero 3. yê Dinya Kurdîstan de yeno kerdene Amerîka, Rûsya û welatanê Ewropa komplo de ca girewt. Kurdê Apogîrî her ca de maruzê hêrişan ê faşîzanan manenê û sîstemê Îmraliyî pê şerî pêro Kurdîstanî ra vila beno.

Tecrîdê Îmraliyî warêko ke tede faşîzmê dewleta tirke û Şero 3. yê Dinya bi hawayêkê tewr giranî yenê caarrdene. Sîstemê îşkenceyî yê Îmraliyî rîyo bîn ê şer û polîtîkayanê vera Kurdîstanî yê. Eke Kurdîstan û herême de faşîzm, sîstemê serdestîya camêrdan bêrê binkerdene sîstemê îşkenceyî yê Îmraliyî zî do bêro binkerdene.

Azadîya Rayber Apoyî pêro dinya de bena rojdem. Çunke paradîgmaya Rayber Apoyî hetê cinî û şaranê dinya ra yena qebulkerdene û famkerdene. Coka ma venga pêro cinîyan û merdimîye danê ke nê têkoşînî wa pîl bikerê.  Eke rayberîya cinîyan ê kurdan û şarê kurdî de  şarê pêro dinya û herême xo rêxistin bikerê û têkoşînêkê hemparî bikerê sîstemê îşkenceyî yê Îmraliyî do bêro binkerdene. Rayber Apo hêzê çareserîya pêro meseleyan o. Pê na raştîye firsend esto ke rêxistin û têkoşîno hempar do bêro berzkerdene. Şensê sîstemê Îmraliyî çin o vera nê cepheyê hemparî vindero.

Hemleya ma 'Vera qirkerdişê cinîyan cinîya azade û komelê azadî bipawê' azadîya Rayber Apoyî gêna merkezê xo. Armanco verên ê hemleya ma yo ke pêro cinîyê dinya, demokratî têkoşîn berz bikerê. Wextê ci yo ke hêzê komplogerî bin bikewê, hesab bidê û faşîzm birijîyo.  Eke hemleya ma pê na hîşmendî rêxistinîya xo bikera Komplo serra 23. de do bin bikewo. Coka ganî ma pêro tewrê hemleya azadkerdişê Rayber Apoyî bibê. 

Rijîyayîşê faşîzmî û rayberîya têkoşînê vera îqtîdarî pê azadîya Rayber Apoyî mumkîn ê. Ma qerardar ê ke nê şertan bîyarê ca. Ma do 15ê Sibate 'roja qirkerdişî' ra bivurnê roja hêvî û serkewtişî Nê esasî ser o sere de cinîyan ma venga her kesî danê ke 15ê Sibate bi hawayêkê xurtî protesto bikerê, tewrê çalakîyan bibê, vera faşîzmî tewirê xo bimojnê. Ma do şorişê Kurdîstanî reyde şorişê cinîyan zî bîyarê ca û faşîzm pê rêxistinî, çalakî û aqlê cinîyan birijnê. Ma do azadîya Rayberîye, cinîyan û şaran bîyarê ca.

Ma pê na qerardarî reyna pêro şehîdanê xo pê minet û rêzdarî yad kenê. Ma soz danê ke ma do vîrameyîşê înan bîyarê ca. Rayber Apo û embazîya cinîyan temînatê ameyoxê şar û cinîyan ê, hêzê azadîye yê. Ma do nê hêzî bivurnê çalakîyan û bikirişê ameyoxî.''