Kolber M.S.yo ke dewa Behremawa ya şaristanê Mêrîwanî ra yo, ANFyî rê qala kerdişanê rejîmê Îranî yê vera kolberan kerde.

Kolber M.S. îfade kerd ke zorbazî û barbarîya rejîmê Îranî ya vera kurdan dewam kena û vat: ''Ma seba kolberîye şinê Tete. Dima ke ma saetêke rayîrî ra şinê  ma resenê Başûrê Kurdîstanî. Ma Başûrî ra cixare, TV ûsn anê. Barê ma giran o. Eke serê sînorî de ma dafikêke bivîne 4 heta 10 saetan uca de manenê. Kolberî Rojhelatê Kurdîstanî ra yê. Eke ma pê dafike bikewê ma maruzê îşkenceyê giranî manenê. Dima zî pastarî bare kenê ma milî û pê bare ma erşawenê qereqolan. Îşkenceyî ra dima berdişê na bare zehmet o. Ge ge zî sînorî ra fîşekî vera dîyenê ma ser û ma neçarî ra agêrenê Başûrê Kurdîstanî. Başûr de zî pêşmergeyê PDKyî vera ma dafikan nanê ro. Verî mesafeyê rayraşîyayîşî kêm  bibî. La Îranî dêsî viraştî. ma zî cayanê bînan ra şinê.  Ma seba ke debarê xo bikerê kolberîye kenê. Rojhelatê Kurdîstanî de bêkarî û xizanîye zêde yê.''
Kolber M.S. bale ante bêvengîya rayaumûmîye ya vera nê kerdişan ser û vat: ''Roje çin a ke kolberî nêkişîyê. La merdimî vera naye bêveng ê. Ez venga merdimîye dana ke wa tewirê xo bimojna. Cayêkê bînî yê dinya de wexto ke kesêk kişîyeno qîyamet nîyeno ro la Kurdîstan de her roje bi seyan kesî qetil benê la her kes bêveng o. Bêvengîye sûc a.''

Kolber M.S. tewr peyên pare kerd ke o hêvî keno ke edalet bêro na dinya.