Badê xespkerdişê şaredarîyanê Amed, Wan û Mêrdînî meclîsê şaredarîyan zî ameybî betalkerdene her çî însafê kesêk rê amebi verdayene. Walîyê Wanî Mehmet Emîn Bîlmezo ke Şaredarîya Wanî xesp kerd, Ulker Cem Kaplano ke bi karanê xo yê leyşinan yeno zanayene kerdbi mudirê VASKÎ. Vervatoxê Meclîsê Şaredarîya Bajarê Pîlî ya Wanî ya ke ameye xespkerdene Cemîl Komîyî derheqê babete qisey kerd.

Komîyî vist vîrî ke 19’ê Tebaxe de roja ke Meclîsê Şaredarîya Pîlî do kombîyayîş biviraştêne qeyûm ame tayînkerdene û va: ‘‘71 encumenê ma estbî. 24’ê înan ê AKP’yî bî. Meclîsê ma ame betalkerdene û selahîyet dewrê grûbêka encumenan bi. Na grûbe de Walîyo xespkar Bîlmez, 5 encemenî û 5 brokratî ca gênê. Nê hesab şarî nêdanê. Karê înan mal û milkê şaredarîye paştgêranê xo rê serwîskerdiş o. ke bi betalkerdişê meclîsan îhaleyan danê paştgêranê xo. Karê qeyûmê verênî yê ke nîmcet mendbî înan danê dewamkerdene. Ma meclîs de bi rojan munaqeşekerdene wina qerar girewtêne. Xora meclîsî heme hetî temsîl kerdêne. Meclîs hemşaredaranê ma ra zafêr bihêz bi.  Ma wina vînayêne. Eke meclîs bihêz bo hemşaredarî zî hîna bîyêne bihêz. Nika peyê beranê qefilnayene de qerarê bi keyfî yenê girewtene û bicaardene. Şarî ra qerfnaya û rixmê şarî çew nêeşkeno çîyêk bikero. Meclîs hetê şarî ra amebi vîjnayenê û rolêkê ci yo muhîm estbi. La nika fonksîyonêkê ci nêmend. Xora ma verî zî dî senî qerarê xelet û bêhuqûqî yenê girewtene. Ceribnayîşê xelatan ra çîyêko raşt nêvejîyeno. Ma biheq ê û ma do miheqeq ser bikewê.‘‘