Dîwanê Hemserekîye yê KONGRA GELî bi eşkerayîyêke Roşanê Êzîyî yê êzidîyan û pêro kurdîstanijan fîraz kerd.

KONGRA-GELî eşkerayîya xo de ard ziwan ke PDKyî serra 2014î de Şingal teslîmê DAÎŞî kerd û nika zî teslîmê Iraqî keno. KONGRA-GELî îfade kerd ke şarê Şingalî vera nê kerdiman bi hawayêkê xurtî xo ver dano.

KONGRA GELî bale ante rewşa xirabe ya Şingalî ser û venga pêro kurdîstanijan da ke wayîrê destkewteyanê xoverdayîşê Şingalî vejîyê. KONGRA GELî şehadetê Mam Beşîrî vist vîrî û pare kerd ke ganî no şehadet bibo wesîleya wayîrvejîyayîşê Şingalî.

KONGRA-GELî vat: ''Ciwananê Şingalî (YBŞ-YJŞ) xo rêxistin kerd û verê qirkerdişê Fermanê 74. girewt. Nê ciwanî nika vera PDK û hukmatê Bexdadî xo pawenê. Pawitişê Şingalî seba ma mesuldarîyêka fîraz, neteweyî û exlaqî ya. Ma bi nê hawayî eşkenê cewabê îşxalker û hemkaran bidê.''