KONGRA-GELî bi beyanatêkê nuştekî venga şaranê Kurdîstanî, organîzasyonan û têgêrayîşanê sîyasî, organîzasyonanê medenî û roşnvîran da ke seba yewîya neteweyî bi tewrêcibîyayîşêkê pîlî beşdarê rayraşîyayîş û mîtîngan bibê.
KONGRA-GELî bi beyanatêkê nuştekî veng da ke sazî û dezgeyê Kurdîstanî, partîyê sîyasî, hunermend û roşnvîrî tewrê rayraşîyayîşanê seba yewîya neteweyî bibê ke 5-6-7 kanûne de yenê kerdene.
Beyanatê KONGRA-GELî wina yo:
“Vera galanê dewleta tirkan ê ke Rojawanî de kena Kurdîstanî de û teberê welatî de xoverayîşêko tarixî ame kerdene û no xoverdayîş hîna zî dewam keno. Galê dişmenan tena vera Rojawanî nîyê bi taybetî vera pêro destkewteyanê şarê Kurdîstanî yê. Bi nê zanayîşî şarê kurdan zî bi rihêkê neteweyî Rojawanî rê wayîr vejîya û waştişê xo yê yewîya neteweyî geş kerd.
Başûrê Kurdîstanî de vera îşxalanê dewleta tirkan şarê ma bi bereyîya hunermend û roşnvîran helwestêko pîroz nîşan da, malê tirkan boykot kerdî. Bi çalakîyanê tewir bi tewiran nê helwestê xo yê neteweyî dewam keno. Ewrupa de hunermend û roşnvîrê çar parçeyanê Kurdîstanî bi kombîyayîşêkê çapamenîye venga yewîya neteweyî da û dîyar kerd ke nê warî de do xebatanê xo dewam bikerê. Reyna Ewrupa de platformê “Defend Rojava” o ke gelek partî, sazîyê medenî endamê ci yê seba tewrêcibîyayîşê “rayraşîyayîşê yewîya neteweyî û xoverdayîşî” veng da ke rojanê 5 û 6ê kanûne de Lozanî ra heta Cenevre di rojî do ray ra şorê.
Roja 7ê kanûne zî pêro dinya de cayanê ke kurdî tey ciwîyenê de bi bereyîya komîteyanê neteweyî yê herêmî, bi sloganê “seba tedeberdişê îşxalkerîye, yewîya neteweyî awan bikerê” her ca de do rayraşîyayîş û mîtîngî bêrê kerdene. Ma nameyê KONGRA-GELî ser o nê vengdayîş û xebatanê seba yewîya neteweyî pêrunan zerrî û can ra selam kenê. Ewro şarê kurdan bi “Şorişê Rojawanî” rojeve dinya de yo. Eke ma şarê kurdan yew veng bê, ma eşkenê dinya ra paştgîrîya tewr pîle bigêrê û galanê îşxalkeran zî tede berê.
Na yewe ra serkewte ma sey KONGRA-GEL vanê ke “Şarê Kurdîstanî tena bi yewîya neteweyî eşkeno îşxalkeran tede bero û çar parçayanê Kurdîstanî de çarserîye bîfîyo xo dest. Yewîya neteweyî waştişê şarê ma yê bi seyan serran o. Lazim o ke şarê ma nê waştişê xo bi çalakî û xoverdayîşanê xo geş bikero û zor bido bi partî û sazîyan ke yewbîyayîşê neteweyî bêro ca.Seba ke pêro cîhan veng û waştişanê şarê Kurdîstanî yê yewîya neteweyî bieşnawo û bivîno waştişê ma şarê Kurdîstanî, organîzasyon û tevgeranê sîyasî, organîzasyonanê medenî, roşnvîran ra o yo ke tewrê nê rayraşîyayîş û mîtînganê seba yewîya neteweyî bibê.''
