Rêxistina HDPyî ya Çewlîgî kongreya xo ya çarine Heyata Veyveyî ya Yeşil Vadî de kerde. Wekîlê HDPyî yê Çewlîgî Erdal Aydemîr, Hemserekê Pêroyî yê KCDyî Berdan Ozturk, endamê Merkezê Partîye yê HDPyî, îdarekarê HDPyî yê Xarpêt û Dêrsimî û bi seyan kesî tewrê kongre bîyî.

Kongre de verî Erdal Aydemîrî qisey kerd. Aydemîrî bale ante polîtîkaya zextî ya îqtîdarê AKP-MHPyî ser û vat: ''Îqtîdar keno ke pê 'planê çokdayîşî' têkoşînê azadîye yê kurdan tesfîye bikero. Wekîl, îdarekrar û endamê partîya ma tepiştî. Şaredarîyan de qeyûm ca kerd û hemşaredarî eştî zîndanan. La rixmê heme zextan vera têkoşînê şarê kurdî de ser nêkewtî. Ewro kongreya ma de reyna yeno vînayene ke şarê ma verê zextan de çok nêda.'' Aydemîrî xoverdayoxanê zîndanan rê selam şawitî û vat: ''Zîndanan de 330ê hezarê  înan bi giranî tepişteyê nêweşî estê ke ganî helêke cuwa ver bêrê veradayene. Birêz Abdullah Ocalano ke 22 serrî yo Îmrali de yo vatbi eke destûr bidiyo o eşkeno hewteyêk de haştîye bîyaro. Caka ganî cade bêrê Îmraliyî bêrê akerdene.''

Berdan Ozturkî zî bi yadkerdişê Qazî Muhammedî dest pê qiseykerdişê xo kerd. Ozturkî vat: ''Têkoşîno ke Qazî Muhammedî da destpêkerdene nika çar leteyanê Kurdîstanî de yeno kerdene û heta serkewtişî zî wina bêro domnayene. Tayyip Erdogan o ke vera kurdan tim xirabîye vîrêjeno meseleya Rûsya û Ukrayna de qala haştîye keno. Na polîtîka semedê şaran nê semedê menfetê ci ya. Vateyê haşîtye geno fekê xo û keno leymin. Amed de wayê diletî yê panc serreyî ameyî berdene qereqol û uca reça engişta wird wayan ameyî girewtene. No ramojneno ke ê senî vera haştîye yê. Îqtîdar dişmenê kurdan û cografyaya înan o. Înan ra têna dehaq vejîyeno. Ferasetê leyminî ca verdê.  

Rojawan û Başûrê Kurdîstanî de hewt serrî yo zulmo ke înan nêkerdo nêmend. La ê se kenê wa bikerî nê têkoşînî de ma do ser bikewê. Çunke ma semedê îqtîdar nê azadîye têkoşîn kenê. Kurdî bi bedalanê giranan heta ewroyî ameyî. Muxalefet vano o do meseleya kurdî çareser bikero la pratîk de gamêke nêerzeno. Muhatabê na mesele Birêz Abdullah Ocalan o. Muxalefet çirey qala tecrîdî nêkeno la îdîa keno ke do mesela çareser bikero. Şarê kurdî Newroza emserî têna wedaritişê tecrîdî nê azadîya fîzîkîye ya Birêz Ocalanî waşte. Rayîrê çareserî zelal o, haştîya bianore têna pê Birêz Ocalanî yena.''

Badê qiseykerdişan Feyzullah Seyhanoglu û Mihribane Ekinci sey hemserekanê neweyan ê rêxistina HDPyî ya Çewlîgî ameyî vîjnayene.