'Krîzê ekonomîkî rûnê keleyî û penîrî rê tesîr kerd'

Krîzo ekonomîk her ke şino beno giranêr. Krîzî narey zî tesîrê penîr, rûnê keleyî û şitî kerd. Amed de penîr, rûno kele û şit hînî nêkewenê destê kesî.

Krîzo ekonomîk her ke şino beno giranêr. Krîzî narey zî tesîrê penîr, rûnê keleyî û şitî kerd. Amed de penîr, rûno kele û şit hînî nêkewenê destê kesî. Çele de se ra 55 heqê rûnê keleyî zêdîya û bi 85 TL.

Semedo ke dest nîyeno traktor û hacetanê citkar û heywankeran ser berardişê şitî zî kêmîyayî. Bazarê penîrî yê kuçeyê Gazî yê Sûrî de têgêrayîş çin o, bazar bêveng o. Esnafanê bazarî ANFyî reyde qisey kerd.

Şehmuz Îlahî ard ziwan ke krîzî ra çew nêeşkeno çîyêk bihêrîno û vat: ''Kar çin o bazar veng o. Verî Amed de merdiman pê kîloyan penîr û rûno kele girewtêne nika çew de pere çin o. Mi serê sibayî dikane akerde, saete bîye 12:30 la qet yew muşterî nêame. Nika zengînî bîyî zengîn û feqîrî zî bîyî feqîr.''

Mehmet Aras (55)o ke 43 serrî yo penîr roşeno vat: ''Rewşa ma zaf xirab a. Ez 43 serrî yo nê karî kena la mi hema emrê xo de rezaletêko winasên nêdî. Ma nêeşkenê şit û penîrê xo biroşê. Rixmê na rewşe zî ma  kîra û faturayan danê. Ma pê deynan deyn danê. Hukmatî her ca qefilna û caya her çîyî zêdînaye. Kam eşkeno çîyêk bihêrîno?''

Azîz Guner (67) zî da zanayene ke o serê sibayî 7 de şîyo dikane û heta nêmrojî ey têna 5 TL qezenç kerdo. Gunerî vat: ''6 domanê mi estê û ez nêweş a. Ez ne eşkena çîyêk biroşa ne zî eşkena weşîya xo reyde eleqeder biba. Ma serê sibayî ra heta şanî ronişenê. Amed de krîzî raverî 850 esnafî estbî. Nika pêroyînan dikanê xo girewtî.''

Şehmuz Bîngol (66) zî vat: ''Domanîya xo ra nata ez penîr roşena. La çîyo ke mi emser dî mi emrê xo de nêdibî. Penîrê ma destê ma de maneno. Rewşa ma xirab a. Eke wina şoro ma mecbûr karêkê bînî kenê.''