Leşkeranê tirkan 5ê temmuze de deweka Kutusî ya dewa Marûnisî ya Colemêrgî de  dewijan Hamît Kaya, Kemal Kurt û Mehmet Duman ê ke gêrayêne pesê xo ser o guleyî varnayî. Leşkeran pê dewijan heqaret kerd û da înan ro. Dewijan pê waştişnameyêkî Walîtîya Colemêrgî rê gerreyê leşkeran kerd la hema zî cewab nêdîya waştişnameyê dewijan.

 Dewijan waştişnameyê xo de ard ziwan ke leşkeran waşt pê guleyan înan bikişê. 

Hetê bînî ra dewijan Şubeyê Colemêrgî yê ÎHDyî zîyaret kerd û agahîyî dayî Serekê ÎHDyî Yusuf Çobanogluyî. Keyeyan waşt ke wa komele hetkarîya înan bikera. Çobanogluyî da zanayene ke ê do serebûtî teqîb bikerê û vat: ''Ma do vera her tewirê binpaykerdişê heqan hetê şarê Colemêrgî de yê.''