Farqîn de seba çalakîya verê HDP'yî keyeyan rê zext yeno kerdene

Leşkerê Tirkî Farqîn de, keyeyanê ke domanê înan tewrê PKK'yî bîyê benê Qereqolê Cendirmeyan ê Merkezî û pê tehdîtan tewrbîyayîşê çalakîya ke berê bînaya HDP'yî de ya înan rê ferz kenî.

Çalakîya keyeyana ke bi îddîaya 'domanê înan pê zordarîye tewrê PKK'yî bî' verê bînaya HDP'yî ya Amedî de ameye destpêkerdene dewam kena. Polîs û leşkerî zî seba ke tewrbîyayîşê na çalakîye bikerê zêde, şinê verê keyeyanê ke domananê înan tewrê PKK'yî bîyê û wazenê ke nê keyeyan tewrê çalakîye bikerê.

Dimayê Mêrdîn û Qezaya Cizîrî ya Şirnexî, eşkera bîyo ke qezaya Farqînî ya Amedî de zî Qerekolê Cendermeyan ê Merkezî, pê tehdîtan keyeyê ke domanê înan tewrê PKK'yî bîyê anê qereqolî û tewrbîyayîşê çalakîya ke verê bînaya HDP'yî ya Amedî de ya înan rê ferz keno. Keyeyan îfade kerd ke fermandarî pê tehdîtan zaf ameyî înan serî la keyeyan nêwaşt ke pê fotografanê domananê xo tewrê çalakîya ke verba HDP'yî de bibê. Fermandarî nê teklîfê xo Farqîn de zî keyeyan ra kenê ke Farqîn de zî çalakîya winasîne bêra viraştene. Keyeyan no teklîfî red kerd. Keyeyan ard ziwan ke fermandaran seba ke keyeyan tewrê çalakîye bibê înan rê teklîfê karî zî kerd. Keyeyan da pêhesanyen ke fermandaran înan rê vat, "Zafê kesî şima ra nêweş kewtî, dewlete bê pere dermanan dana şima û şima kena weş. Ewro karê dewlete bi şima esto û şima nêşkenî xizmetê dewlete bikê. Ma fikirîyayîşê şima baş zanenê. La şima rê gune yo. Bêrê domananê xo înan ra biwazê. Keyeyan cewabê fermandarî da û ard ziwan ke çareserî çalakîya berê HDP'yî de nîya û ê do qet tewrê çalakîya winasîne nêbê.