Goreyê xebera Mozopotamya 10 multecîyê ke qezaya Dirbesiyê ya Kantonê Hesekê ra ravêrtenê Qoserê Mêrdînî 5ê teşrîna verêne de hetê leşkeranê tirkî ra ameyî ferqkerdene. 6ê înan ameyî tepiştene, 1 sînor ra ravêrt hetê Qoserî û 3 hebê bînî warê telê sînorî de mexsur mendî.

Goreyê îfadeyê multecîyanê ke weş mendî 4 multecîyî bizor ancîyayî erazîya mayînine û ameyî înfazkerdene. Ê bînî zî ameyî derbkerdene û teberê qeyîtî de ameyî destbendkerdene.

Multecîyan ra A.J.yî  (16) vat: ''Hela ke leşkeran ma tepiştî elektrîkê destan da destê birayê mi û vat 'şi bigerê ê bînan.' Leşkerî hetêk ra zî nizdîyê birayê mi rê tifing eştene. Birayê mi zanîyanê xo ser gerayêne. Ez biney tira dûrî bîya. Biney wata şi vengê teqayîşêke pîlî ame. Senî ke dima mi  fehm kerd wexto ke birayê mi o heta şi, hîrê kesê bînî remayî û kesêk payna mayinî. Ma berdî qereqol û roja bîne seba ke ez birayê xo persaye, semedê teşîskerdişê birayê mi, mi berd nêweşxane. Leşkeran bi zanayîş birayê mi ant erazîya mayînine. Ez nêweşxane de nêameya muayenekerdene la derheqê mi de raporê edlîyî ame girewtene.''

Avûkatê A.J.yî zî bale ante ser ke muvekîlê ci hîrê rojî nezarat de mend la derheqê ci qerarê destbendkerdişî çîn o û vat: ''Muvekîlê me hîrê rojî vêşan û têşan nezaret de mend. Goreyê îfadeyê ci leşkerî bizor çeke dayo sereyê birayê ey ro  û şawit erazîya mayînine. Reyna o xo zî raştê hêrişê leşkeran ameyo û amadeyo ke nê leşkerî teşhîs bikero.''