Hemsereka KCD’yî Leyla Guvene seba qedînayîşê tecrîdkerdişê Rayberê Şarê Kurdî Abdullah Ocalanî 160 rojî yo ke grevê vêşanîye yê bêdem û bêagêrayîşî de ya.

Hem-vervatoxa Delegeyanê KCD’yî yê Amedî Zelal Bîlgîne ya ke verê Guvene de manena ANF’yî rê qalê xoverdayîşê Guvene kerd.

Bîlgîne ard ziwan ke aye xoverdayîşê Guvene ra xeylî çîyan mûsaya û vat, “Ma mûsena tirem bi nasnameyê cinîye mucadele senî yeno dayene. Verê her çîyî ma sebir mûsenê. Xoverdayîşî panc mengî xo ra dima verdayî, çîyêko asan nêyo. Ma qalê cuyêk kenê ke timî heman cayî de bi werdişê sole û şekirî dewam keno. Wayîrê îrade û bawerîyêka winayên a ke heta bicaameyîşê waştişanê xo eşkena nê halî bidomno. Ma zî bi rayîrê nê xoverdayîşî cewherî mûsenê. Ma qalê sîyasetmedarêka cinî kenê ke bi mûsayîşê cewherê bawerî û felsefeye, cuya xo bi nê cewherî awan kena. Nasnameyê cewherîyî, mucadeleyê cewherîyî û vînayîşê cewherîyî mûsnena ma.”

‘Her Kesî Ser o Tesîr Kerd’

Bîlgîne ard vîrî ke heta nika xeylî kesî ameyê serdana Leyla Guvene û serdanan de aye her kesî ser o tesir kerdo û vat, “Têkilîya aye merdiman dir xeylî pîl a, ke dej û kêfweşîya tebere xo hîs kena. Bêmabên aye rê telefonî yenê. Merdimê ke tena reyêk Leyla Guvene dîyê zî wazenê reyna bêrê serdana aye.

Çunke Leyla Guvene dejê merdiman goşdarî kena û eşkena fam bikero. Sîyasetmedarêk a ke teqez dejanê merdiman rê çareserîye vînena. Têkilîya ke nê ser o ronana, têkilîyêka serê ercanê merdimîye de ya. Naye ra merdimi benê heyranê aye. Cuya ma de xeylî çîyî vurenê û do tîya ra tepîya zî bivurîyê. Şahidîya nê îradeyî û mucadeleyê aye, seba ma heminan sebebê serberzî yo.”

‘Bala Aye Xoverdayîşê Zîndanan Ser o Yo’

Bîlgîne da zanayene ke Leyla Guvene heta aye dest ra yeno rojdemê pêroyîyî şopnena û vat, “Hetêk ra wazena têgêrayîşê cimatkîyî yo ke no xoverdayîş bibo bingeyê ci şopnena. Bala birêze Guvene tewr zaf zîndanan ser o yo. Xusûsen weşîya xoverdayoxan meraq kena. Çunke nika bêhuqûqîyêka pîle yena kerdene. Xora zîndanan de heqê merdiman yenê binpaykerdene. Timî çîyan tepişteyan ser o ferq kenê. Bi grevanê vêşanîye no xeylî bi zêde. Cewabê îhtîyacîyanê çalakwananê grevê vêşanîye nêno dayene. Bê ke çew înan ver de estbo hucrayanê yewkesîyan de yenê bicakerdene. Birêze Leyla Guvene nê heminan şopnena. Heta ke aye ra yeno babetan şîrove kena û biqesawet a. Xora seba ke halê aye yê weşîye rind nêyo, timî îhtîyacîya ci bi hewnî esta.”

‘Mergê Ciwanan Tesîrêko Giran Aye Ser o Viraşt’

Bîlgîne bale ante serê tesîrê çalakîyanê fedaîyan ê zîndanan ê serê Guvene û vat, “Sere de ma xebera Zulkuf Gezenî girewte. Dimayê na xebere ra, merheleyêka newî dest pêkerde û weşîya aye hîna bîye xirabe. Nê xeberê ke zîndanan ra ameyî serê psîkolojîya embaze Leyla de tesir kerd. Vînayîşê merdimanê ciwanan tesîrêkê giranî aye ser o kerd ke aye mayêk a, cinîyêk a, xoverdayoxêk a. Çunke Leyla Guvene seba ke her kes biciwîyo û çew nêmiro dest bi çalakîye kerd û yew bi yew a keyeyanê tepişteyan fikrêna. Birêze Guvene çalakîyanê zîndanan ra dima eşkerayîyêk daye. Ard ziwan ke xoverdayîşêk esto û ganî her kes dorê xoverdayîşî de bêro têhet. No xoverdayîş wayîrê îrade û hêzêkê hende pîlî yo ke cuya yewbînan paweno.

Bicaameyîşê waştişanê heqdar û meşrûyan ê Leyla Guvene do Tirkîya bibo demokratîke û şarê Tirkîya bibê wayîrê atmosferêkê aşitîyane û bihuzûrî. Mucadeleyêk esto ke verê xo dayo ver bi azadîye û bedelan wazeno. Gama ke her kes dorê nê mucadeleyî de ame têhet, a game do serkewtiş nizd bo.”