Dewleta tirke dewanê Dêrxust, Huseynîg, Cinezûr û Mişirfî yê qezaya Licê ya Amedî de 9ê çeleyî de operasyono leşkerî dabi destpêkerdene ke dima ra nameyê 'Operasyonê Lîce yê Eren-2î' dîya ci. Çarçewa operasyonî de 27 kesî ameyî tepiştene.

Mabênê 9-18ê çeleyî de Mehmet Şah Bozkuş, Siddik Ozkan (63), Ferhat Ozkan û Omer Yildirim û 4 kesê ke nameyê înan nêmane musayene temamî de 8 kesî bi îdîaya 'endamîya rêxistine'  ameyî tepiştene.

19ê çeleyî de reyna dewanê Dêrxust, Xezmaz û Sîse de xeylêk keyeyî ameyî sereştene. Sereştişan de tewr tay 35 kesî ameyî destbendkerdene. Nînan ra 19 kesî ameyî tepiştene, 7 kesî bi şertê kontrolê edlîyî ameyî veradayene.

Badê tepiştişan serkêşîya wekîlanê HDPyî de heyetêk dewijî zîyaret kerdî. Dewijan vat înan rê zaf zext ameyo kerdene. Ê raştê heqeretî ameyî û peykî ameyî kelemçekerdene.

Herême de têgêrayîşo leşkerî dewam keno. Dewan de wesayîtê zirxinî gêrenê.