Dewanê Dêrxus, Huseynîk û Karahasan û tay dewekanê qezaya Licê ya Amedî operasyono leşkerî yo ke perey dest pê kerd dewam keno. Herême de leşker û wesayîtê zirxinî ameyî cakerdene û sixletîya gêrayîşê helekopteran, SÎHA û ÎHAyan esta.

 Partîya Demokratîke ya HDPyî derheqê operasyonê leşkerî yê Licê heyetêk şawit.Heyet de Wekîla HDPyî ya Amedî Remzîye Tosun û îdarekarê rêxistina  bajarî tede de ca girewt. Heyetê ke waştêne dewanê ke tede operasyonê yeno kerdene zîyaret bikerê dekewtişê qeza de ame vindarnayene. Heyetê vat ê wazenê keyeyê ke ameyî sereştene zîyaret bikerê. Nayî ser o leşkeran heyetê tehdît kerd û vat ''eke şima tîya ra meşirê ma do zor bişuxulnê.''

Heyetê ke deweka Penavî de dewijan de pêvînayîş kerd da zanayene ke cinîyêke înan ra wina vat: ''Pêro keyeyî binê ablûqa de yê. Vizêr hayîya ma tiway ra çinêbî, vengê çekan ame ma vazdayî teber. Domanê ma koyan de pês çerênenê. Her ca girewto binê ablûqa coka ma nêeşkenê heywananê xo vejê teber. Leşkeran çar şiwanê ma kuwayî. Ma ser o zextê psîkolojîk kenê.'' Heyetê bado ke wexto derg leşkeran de muneqeşe kerd bê zîyaretê dewan agêra.

Hetê bînî ra ame musayene ke semedê birnayîşê daranê dewa Dêrxusî qezaya  Pasûrî ra qorîcîyî dîyayî ardene.