Temsîlkaranê partî, sazgeh û dezgehanê kurdan ê ke Lozanê Swîsî de kom bîyî seba caardişê yewîya neteweyî terraqe kerde. Kombîyayîş Merkezê Komelê Kurdan ê Demokratîk ê Lozanî de ame kerdene. Kombîyayîşî de temsîlkarê KNK, KCDK-E, YNK, PYD, Goran û PJAKî û zaf partî û dezgehî amade bîyî. Kombîyayîşî de sere de Rojawan babetê çar parçeyê Kurdîstanî ameyî erjnayene û caardişê yewîya neteweyî yê kurdan ser o ame vindertene.

Kombîyayîşî ame vatene ke seba ke bale biancê qewimîyayîşanê 4 parçeyanê Kurdîstanî mabênê 5-6ê kanûne de Lozanî ra ver bi Cenewre do rayraşîyayîşêk bêro kerdene. Hemserekê KCDK-E Yuksel Koçî qisey kerd û vat: "Seba ke kurdî yew nîyê tay hêzî naye sey firsend vînenê. Naye ra ganî ma pêro mesela xo çare bikê û Yewîya Neteweyî ya Kurdan awan bikê.''

Nameyê YNKyî ser o Bextîyar Şêxanîyî qisey kerd û vat: "Ma sey YNK rayraşîyayîşî de do amade bibê. Ma venga pêro roşnvîran danê ke rayraşîyayîşî de amade bibê. Roje a roj a ke ma vera hêrişan bibê yew."

Nameyê Goranî ser o Hesen Mihemed Rizayî qisey kerd û îfade kerd ke seba yewîya neteweyî no rayraşîyayîş girîng o û ganî pêro Kurdistanijî tewrê ci bibê.

Kombîyayîşî de temsîlkaranê PYD, PJAK, KNKyî zî qisey kerd û yewîya neteweyî nîşan da û vengdayîşê tewrê rayraşîyayîşî bîyayîşî kerd.

Rayraşîyayîşê Yewîya Neteweyê Kurdan 5ê kanûne de verê bînaya Palais de Rumine de do dest pê biko ke peymana Lozanî a roje amebi îmzakerdene û semedê ci ra Kurdîstan bibi çar parçe.  Roja verêne ya rayraşîyayîşî de çalakîkerî do biresê şaristanê Renensî û Place le Marche de do beyanatêk bikê. Dima zî bi babeta yewîya neteweyî semînerêk do bêro serûberkerdene û konsero neteweyî yê kurdan do bêro kerdene. Yeno pawitene ke zaf deyîrbazî do konserî de amade bibê. Rayraşîyayîşê di rojan 6ê kanûne de Ofîsê Neteweyanê Yewbîyayeyî de do biqedo.