îşxalê dewleta tirke yê vera Rojawanî ra dima yewîya neteweyî ya kurdan bîye rojdem. Pêşmergeyê verênî Abdullah Yusuf Silêmanî yo ke dewa Roboskî ya qazaya Qilebanî ya Şirnexî de ciwîyeno venga partîyanê sîyasîyan û rêxistinan da ke yewîya neteweyî ya kurdan awan bikê.

Silêmano ke serra 1976î de Başûrê Kurdîstanî de pêşmergeyî kerde vat: "Ez seba destkewteyanê Başûrê Kurdîstanî sînorî ra derbaz bîya û mi uca de xizmet kerd. Mi seba erdê Kurdîstanî şer kerd. Nika reyna hêrişê vera Kurdîstanî yenê kerdene. Kurdî ganî vera nê hêrişan bibê yew. Heta seba yewîye ma erey zî mendî. Erdê kurdan kerd 4 perçeyan. Vera kamyew parçeyî hêriş estbo ganî ma verê xo bidê uca. Ma ganî seba erdê xo xo ver bidê."

Silêmanî bale ante ser ke hînî pêro dinya kurdan şinasnena û wina dewam kerd: ''Yewîya neteweyîye xeyalê pêro kurdan a. Ganî hînî ma firsendê tarîxîyî biercnê, wextê ci ame. Ez venga pêro partîyanê sîyasîyan ê kurdan, rêxistinan û dezgehanê kurdan dana ke wa bêrê têhet û seba yewîya neteweyîye çareserîye bivînê. Kurdî hînî şar ê ke rayberîye kenê û bala pêro dinya ancenê. Ma zî sey herkesî heqanê xo yê meşrûyan wazenê. Ganî her kes menfatê xo yê şexsîyî caverdo û seba yewîye bêro têhet. Eke ma yew nêbê ma do hîna zêde bêrê kiştene, qetilkerdene. Her kes do erdê ma îşxal biko. Coka ma awe ra zêder hewceyê yewîye yê.

8 serrî verê cû teyarayanê TSKyî Roboskî de 19ê ci domanî 34 merdimê ma qetil kerdî. Eke ma yew bibîyêne, no nêameyêne ma ser. Eke ma yew bibîyêne Enfal de, Rojawan de, Başûr de, Rojhelat de û Vakur de kes nêeşkayêne ma qetl bikê. Key ma yewîya neteweyî ya xo awan bikê ma do ser bikewê û verê hêrişan de vinderê."