Sancarî Qoser de qisey kerd û vat: ''Seba çareserîyêka mende ganî kurdî sey kerdox bêrê hesibnayene, temsîlkarê kurdan zî sey aktorêkê têdûştî bêrê qebulkerdene.'' Sancarî pare kerd ke ê do bikerê ke kurdî tewrê îdareyê Tirkîya bibê.
Hemserekê Pêroyî yê HDPyî Mîthat Sancarî qezaya Qoserî ya Mêrdînî de Bazarê Genimî de esnafî zîyaret kerdî.
Sancarî Bazarê Genimî de qisey kerd û bale ante meseleya DEDAŞî ser. Sancarî vat: ''Na meseleya ceyranî berardiş asteng kena.Bazarê Genimî hewcedarîya genimî ya Tirkîya se ra 20 peyda keno. Polîtîkayê DEDAŞ û îqtîdarî herême kenê mexdûr. Şerê Zereyî yê Sûrîye ra bazirganîye seke vinderta. 7-8 serran ra nata welat de krîzo ekonomîk esto. La no qeder nîyo, tercîhê sîyasî û ekonomî yê.''
Sancarî qiseykerdişê xo wina dewam kerd: ''Ma armanc kenê ke şarê kurdî pê nasnameyê ci biresnê asta îdareyî. Ma kerd nêkerd îqtîdar seba çareserîye tênêgêra. Ma wazenê kurdî pê nasnameyê xo tercîhan bikerê û xo îdare bikerê. Ma do bikerê ke kurdî pê nameyê xo tewrê îdareyê Tirkîya bibê.''
