Gerîla Hennaya ke manaya nameyê ci aram û hîsgerî ya, Rojhelatê Kurdîstanî ra ya. Zerrîya aye bi eşqê Kurdîstanî bi taybetî bi eşqê şarê Vakurî pirr a. Vana: ''Ez koyan ra zaf hes kena çunke koyî mi resnenê pêro parçeyanê welatê mi.'' Gerîla Henna zaf qisey nêkena labelê wexto ke qisey kena zî merdimî qiseyanê ci ser o fikirîyenê.

Henna bi bêvengî roniştbî, destêkê ci de keleşê ci destê ci yê bînî de zî dûrbîn estbî û ewnîyayêne dormeyê xo. Dima ez pê hesîyaya ke gerîla Henna ha ewnîyena welatê xo Rojhelat. Peynîya bêvengîya xo arde û vat: ''Cinîyê Rojhelatî pabeyê çita yê, çira nênê koyan? Rojhelat PKKyî ra zaf hes keno. Perwerîya şarê ci yê seba PKKyî hetê her kesî ra zanîyena. Dayîka mi wexto ke qala serra 1999î qala esîrbîyayîşê Rayberîye kena bermayêne. Vatêne ma bêwayîr mendê.''

Hanna ameya koyan ke Rayberê xo azad bikera û pêro dadîyan kêfweş bikera. Rojhelatî ra tewr zaf cinîyî ameyî koyan. Henna her tim qala ci kerdêne ke cinîyê Rojhelatî senî sereberz ê, xidar ê û şinê koyan. 

Henna Koselanî xeylêk herêman de gerîlatîye kerde. Nika zî Cengê Heftanîn de vera artêşa tirke ya îşxalkere şer kena. Henna serra 2014î de peyê Koyanê Koselanî de keyeyê xo ra vejîyaye û tewra gerîlayan bîye. Gerîla Henna nika zî Cengê Heftanînî de seba xo û cinîyanê bînan şer kena û bi qerardarî vana: ''Ma do her ca dişmenî rê bikerê Cengê Heftanînî.''