Qezaya Agirî ya Bazîdî  ya ke dimayê tayînkerdişê qeyûmî peykerê Ehmedê Xanîyî ameyo rijnayene de Partîya Şaran a Demkoratîke (HDP) se ra 68,3 bi nisbetê rayan reyna şaredarîye qezenc kerd. Hemsereke şaredarîya HDP’yî yê  Bazîdî Yildiz Acare û Cesîm Çakanî seba netîceyo ke înan girewto şarî rê spas kerd.

Tornanê Ehmedî Xanî rê spas

Cesîm Çakanî ard ziwan, Bazîd qelaya Serhedî yo û 20 serrî yo partîyê ke xeta HDP’yî ser o yenê qeza de tim ser kewtê û vat, “La wezîfeyo ma yo verên peykerê Ehmedê Xanî yo ke ameyo rijnayene newe ra viraştiş o. Wexto ke qeyûmî peykerê Ehmedî Xanî da rijnayene ma soz da şarê xo ke ma ê newe ra cayê ci de tîk kenê. Ma do wextêko kilm de peykerê Ehmedî Xanîyî bi merasîmêkê biîhtîşamî newe ra virazê. Ma şarê Bazîdî rê, tornanê Ehmedî Xanîyî rê zerrî û can ra sipas kenê. Ma soz danê ke ma do layiqê înan bibê.”

Cinîyan hêzêko gird da ma

Yildiz Acare zî ard ziwan ke înan prosesê weçînayîşî yo giran xo pey de verda yo û vat, “Şarê ma Bazîd qeyûman ra girewt û ma û xo rê kerd dîyarîye. Şarê ma bi zerrî û can xebatîya û netîceyê nê xebatan zî girewtî. Ma şarê xo rê zaf sipas kenê.  Nê serkewtişî de keda cinîyan a girde esta. Cinîyan, mojna ke HDP partîya cinîyan a û cinîyan her war de no ard ziwan. Wextê weçînayîşî de cinîyan hêzêko gird da ma.”

Acare ard ziman ke ê sazgehê cinîyan  ke hetê qeyûmî ra ameyê padayene newe ra abikerê û seba persanê şarî û xebatan, berê şaredarîya heta peynîye do akerde bo.