Heyetêkê cinîyanê Şingalî rayberîya Hemsereka Heyetê Îdareyî yê Meclîsê Xoserîya Demokatîke ya Şingalî Rîhame Hico de Silêmanî de pêvînayîşan keno. 

Rîhame derheqê pêvînayîşan û peymana Bexdad-Hewlêrî ya seba Şingalî de ANFyî reyde qisey kerd.

Rîhame vat: ''Sey Têgêrayîşê Azadîye yê Cinîyan ê Êzidxanî (TAJÊ) ma Silêmanî de bi armancê nêzdîbîyayîşê yewbînan pêvînayîşan kenê. Reyna planê ma esto ke ma derheqê qirkerdişê cinîyan de kongre yan zî konferansêk bidê. Ma pêvînayîşanê xo de derheqê Şingalî de zî nîqaşan kenê. Nika armancê ma yo verên no yo ke ma na peymane batal bikerê û sereraşt bikerê. Çunke na peymane ma ra bêxebere ameye kerdene. Na peymane de nasname û menfaatê êzidîyan ca nêgênê. Bi na peymane karo ke DAÎŞî nêmcet verda, yeno temamkerdene. 

Ma rêxistinanê cinîyan ê PDK, YNK û Goranî reyde pêvînayîşî kerdî. Rêxistina Goranî vat ke ê paştî danê ma. Ma zî înan ra waşt ke wa wekîlê înan parlamento de vera peymane tewirê xo bimojnê. Cinîyanê PDKyî zî ard ziwan ke PDK parlamento de wayîrê zêdêr kursîyan o. Ma no tewirê înan rexne kerd.

Ma wazenê şingalijî  wa îdareyê xo, bi xo bikerê, hêzê Şingalî wa Şingal bipawê û xoserîya Şingalî bêra caardene. Her çî ra verî ma wazenê na peymane bêra sereraştkerdene. Şingal de perro hîrêyîn esto û o zî Îdareyê Xoserîya Demokratîke yo. Eke îradeyê nê îdareyî nêro hesibnayene Şingal de meseleyî benê pîlêr.''