Tepişteyê dewaya PKK û PAJKî 27ê teşrîna peyêne ya 2023yî ra nata vera tecrîdê Îmraliyî û seba çareserîya meseleya kurdan grevê vêşanîye de yê. Dadî û merdimê tepişteyan zî seba paştdayîşê grevî Nobeta Edaletî kenê.

Mayê Haştîye yê ke Wan de Nobeta Edaletî de yê, înan ANFyî rê qisey kerd û venga pêro kesan da ke seba grevê vêşanîye yê tepişteyan hîsger bibê.

Dayîke Saadete Oklu ard ziwan ke ê 44 rojî yo Nobeta Edaletî kenê û vat: ''Zîndanan de domanê ma zî 44 rojî yo grevê vêşanîye de yê. Ez venga wekîlanê ma dana ke wa paştî bidê nobeta ma. Ma nêwazenê ke domanê ma bimirê. Ma seba haştîye tîya de yê. Ma wazenê ke wa tecrîd bişikîyo; çunke haştîye bi ney mumkîn a.''

Dayîke Xanê Aydin vat: ''Wa çew verê çalakîya ma de bêveng nêmano. Wa tepişteyan de pêvînayîş bêro kerdene. Wa tecrîd wedarîyo. Ma venga Wezîrîya Edaletî danê ke tecrîdî wedarna. Wa Birêz Abdullah Ocalan azad bibo, tecrîd wedarîyo, aramî û haştîye bêrê. Ma venga wekîlanê xo danê ke wa Meclîs de na babete bikerê rojdem.''