Mazbatayê hemşaredaranê HDP’yî yê Bajarê Girdî yê Amedî HDP’yî  û çar qezayanê ci hema nêameye dayene. Hemşaredaran seba girwtişê mazbatayanê xo muracatê Hewyetê Weçînitişî yê Bajarî kerd.

Hemşaredarê yê Bajarê Girdî yê Amedî yê HDP’yî  Selçûk Mizrakli û Hulya Alokmen Uyanike û hemşaredarê  Yenîşehîrî Belgîn Diken û Îbrahîm Çîkek, hemşaredarê Kayapinarî  Necatî Pirinççioglu û Kezîban Yilmaze, hemşaredarê Baglarî  Zeyan Caylan û Zubeyde Zumrute, hemşaredarê Sûrî  Fîlîz Bulutekîne û Cemal Ozdemîr û endamanê meclîsî yê Şaredarîye semedê girewtişê mazbatayanê xo dîlekçe dayê Hewyetê Weçînitişî yê Bajarî.

Hemşaredaranê HDP’yî dima zî binê ablûqaya polîsan de vernîya Heyetê Weçîninişî yê Bajarî de eşkerayîyêk daye. Hemşaredar Selçûk Mizrakli qeyûmê ke şaredarîyanê DBP’yî rê ameyîbî tayînkerdene ardî vîrî û va: ‘‘Îradeyê şarî qeyûmî fetinayî. Sey xeylî bajaranê bînan Amed de zî şar rixmê heme zext û xîleyanê îqtîdarî namzedê xo weçînayî û qeyûmî eştî teber. Sere de Amed xeylî cayan de mazbatayê hemşaradaranê ma nênê înan dayene. YSK binşewe reyna qerar girewt ke Stenbol de do 51 sindoqan de reyna weçînitiş do  bêro viraştene, la Milazgirê Mûşî ya ke îqîtdar bi ferqê 3 rayan ser kewto de îtîrazî qebûlnêkeno. YSK eşkera hetkarîya xo ya hukmatî ramojneno. Ganî cadê vernîya nê bêhuqûqîye bêro girewtene û helêk cuwa ver mazabatayê ma bêrê dayene.‘‘