Komeleya Paştdayîşê Keyayanê ke Merdimê  xo Vînî Kerdî MEBYA DERî bi eşkerayîyêke bale ante hêrişê vera goristanan ser.

Eşkerayîye de ame vîrardene ke hêrişê vera goristanan her tim zêdîyenê û nê ameyî parekerdene: ''Wan, Amed û xeylêk bajaranê bînan ê Kurdîstanî de gorî verê çimanê merdimanê ci de ameyî rijnayene. No proseso ke heme dinya rîyê vîrusê Korona ra bîya seferbere, îqtîdar hêrişê şarê kurdî û erjanê ci keno.  No zî dişmenîya ya dewleta tirke ya vera ziwan û kulturê kurdan reyna ramojneno.

Îqtîdar her roje bi kerdişêkê xo anorê merdimîye binpay keno. Herinda vera janî de têgêrayîşî de polîtîkaya vera heqanê demkratîkan û azadîyan rayra beno. Operasyonê leşkerî û sîyasîyî dewam kenê û her roje zîndanan ra tabûtê ciwanan vejîyenê. Aşma Remezanî ya ke aşma tewr bimbareke ya dînê Îslamî ya de xebera mergê Mustafa Koçako ke semedê waştişê ''hukmkerdişê edîlî'' rojeyê mergî de bi ameye. Bawerîya dînî ya komelî rê hurmet nêmendo. Ne merde rê ne zî gorî rê hurmet nêmendo.

Aşma Remezanî de gorîstanî yenê rijnayene. Ma tîya ra veng danê berpirsîyaranê îqtîdarî wa hînî guneyê şarî milê xo mekerî û nê caardişan cade vindarnê. Ganî Wezîrîya Dîyanetî îzahê naye bikero. Eke ê vanê cayê nê kerdişan bawerîye, vîjdan û dînî de esto, wa ma rê zî vajî kam yew ayet, sure û hadîs de ca gêno. Keyeyan ra bizor yeno waştene ke wa goranê domananê xo pê destê xo birijnê. No senî hetê huqûq û ehleqî ra yeno îzahkerdene? Ma sey MEBYA-DERî vera  nê caardişan ê û ma do pîya bi keyeyan vera na nêheqîye têkoşîn bikerê.''