Komeleya Kultur, Yewîye, Paştdayîş û Hetkarîye yê bi Keyeyanê ke Dergûşê Medenîyetan de Merdimê Xo Vînî Kerdî (MEBYA-DER) kongreya xo ya diyîne kerde.

Kongreya ke bi şîarê ''Bi ruhê yewîya neteweyîye wextê azadîye yo'' Yenîşehîrê Amedî de ameye kerdene de pankartê kurdkî yê sey "Em dayikin jiyané diparézin", "Destén xwe ji nirxén me bikşînin", "Bi xeyalén cangoriyan em xwe bi réxistin dikin" ameyî daliqnayene.

Hemserekê Pêroyî yê KCDyî Berdan Ozturk, wekîlê HDPyî yê  Amedî Semra Guzel û Remzîye Tosun, Hemserekê HDPyî yê Amedî Gulşene Ozer û Zeyyat Ceylan û temsîlkar û endamê DBP, Rêxistinê Komelê Sîvîlî, TJA û MED TUHAD-FEDî tewrê kongre bîyî.

Remzîye Tosuna ke tîya qisey kerd bale ante tecrîdê serê Rayberê Şarê Kurdî Abdullah Ocalanî ser û vat: ''Her hetî ra şarê kurdî rê zulm kenê. La ê se kenê ma bikerê rixmê heme hêrişanê înan têkoşînê ma do dewam bikero.''

Berdan Ozturkî zî vat: ''Pê kiştiş û qirkerdişî şarê kurdî nêno qedînayene. Adresê çareserî Birêz Ocalan o. Şima masaya haştîye qeldaye, la ma do nê têkoşînî heta peynî bidomnê.''

Dayîka Egîd Îpekî Halîse Aksoya ke cenazaya lajê ci pê PTTyî ci rê ameye şawtene aye zî semedê yewîye veng da.

Badê qiseykerdişan mesajê Hemsereka  MEBYA- DER Yuksel Almasa ke Zîndanê Amedî sey rehîne yena tepiştene ame wendene.

Dima ke raporê falîyetî ame wendene îdareyo newe ame vîjnayene. Hemserekîye rê Şehmus Karadag û Yuksele Almas ameyî vîjnayene.