21ê sibate de Îran de weçînayîşê parlamentoyî do bêro kerdene. La teda û zorbazîya rejîmî ra û redkerdişê zaf namzetan ra, kerdişanê antî-demokratîkan ra KODARî û PJAKî  bi eşkerayîyêka hempare pare kerdbi ke ê do weçînayîşan boykot bikerê. Hemserekê KODARî Fuad Bêrîtanî derheqê babete de ANFyî reyde qisey kerd.

Fûad Bêrîtanî : ''Cayêk de hegemonyaya îdeolojîke serdest bibo uca de hînî hêz, enerjî, vate benê veng û tewr peyêne de zî raîtîya bena qels. Parlamentoya Îranî bîye cayê kiştişê îradeyî. Parlamentoya Îranî de kam esto ke vengê hawaran bieşnawo, kam esto ke menfaatê şarî bido verê menfaatanê xo û partîya xo? Kam esto ke vera zorî û zulmî bêveng nêmano? Temsîlkarê na parlamento têna xîret kenê ke raştîyan binimnê.

Rewşa winasêne ya Îranî de têna kar û gureyê parlamento û dezgehê dewlete qebulkerdişê nê sîstemî û meşrûkerdişê ci yo. Na rewşe de tewrbîyayîşê weçînayîşan yeno manaya tesdîqkerdişê kiştişan, dardekerdişan û bêvengîye yo. Raydayîşê seba namzetanê ke fîltreyê sîstemî ra vîyartî yeno manaya tesdîqkerdişê pêro kerdişanê nêmşrûyan, dizdîye, krîzê ekonomîkî yo. Coka boykotkerdişê weçînayîşî bire û sozê şorişgêrîye yê komelî yo. Kesê ke pabesteyê nê sozî yê şekenê ameyox de îranêkê azadî awan bikerê û bi hawayêkê azadî û sereberzî biciwîyê. Komara Îslamî ya Îranî bi xo semedê pêro sûcan, alozîyan, krîzan, meseleyan a. Ma sey şarî hetê sîstemêkê winayênî de do ca nêgêrê.''