Merdimanê hîrê şehîdanê HPGyî cenazayê xo girewtî
Gerîlayê HPGyî Şehmus Akyol, Ahmet Demir û Muhammed Fuad Nûsretî ê ke koyê Sipêrêzî yê dewa Tiloranî ya Geverî de şehîd bîyî, cenazayê înan hetê keyeyanê înan ra ameyî girewtene.
Dewleta tirke ya îşxalkere 16ê hezîrane de dewa Tiloranî ya qezaya Geverî ya Colemêrgî de operasyon dabi destpêkerdene. Roja 4. ya hêrişê îmhayî de Gerîlayê Azadîye yê Kurdîstanî Serxwebûn Amed (Şehmus Akyol), Avareş Pirsûs (Ahmet Demir) û Raman Sine (Muhammed Fuad Nûsretî) hêrişê bi droneyê çekdarî de şehîd bîyî. Şehîdî eynî roje semedê optopsî wedarîyayî Nêweşxaneyê Dewlete yê Hakkari.
Merdimanê şehîdan 3ê temmuze de muracatê Serdozgerîya Komare ya Hakkari kerd ke cenazayanê xo bîgêrê. Bado ke netîceyê testê DNA safî bîyî, cenazayî vizêr teslîmê keyeyanê înan bîyî.
Cenazayê Serxwebun Amed, Avareş Pirsûs û Raman Sine semedê definkerdişî ameyî berdenê Amed, Pirsûsê Riha û Geverê Colemêrgî.
