Çalakîya Ciwananê Başûrê Kurdistanî ya ‘Mertalê Gandarî’ Bradost de 24’ê Hezîrane de dest pêkerdebî û ewro roja xo ya 7’ine de dewam kena.

Çalakgeranê Mertalanê Gandaran Bradost de bi eşkerayîyêk qirkerdişê Kortekî û tewirê hukmatê Başûrî şermezar kerd û vengdayîş heme şarê Kurdî û ciwanan rê kerd ke reaksîyon nîşan bidê.

Çalakgeran da zanayene ke amancê dewleta Tirkî ya îşxalkare teyna PKK û hêzê gerîlayan nîyê, amancê înan qetilkerdişê temamê şarê Kurdî yo.

Eşkerayîye de ame vatene, “Rojanê peyênan de tewirê hukmatê herêma Başûrî  bewlî bi. Bi eşkerayîya xo bi hawayêkê eşkera PKK’î sucdar kerd û hetkarê hêrişanê dewleta Tirkî ya îşxalkarê bi. Her kes zano ke PKK kam o. PKK waye û birayê ma yê. Labelê ma baş zanê hukmatê herême zî kam o.”

Mertalanê Gandaran bale ante serê bêvengîya hukmatê Başûrê Kurdistanî ya vera îşxalkarîya dewleta Tirkî û da zanayene, “Qirkerdişê Kortekî bi zanayîş ame kerdene. Heme kesî zanê ke o wesayît yê çi yo. Tu çîyêkê eskerî bi ney çin bi. Armancê dewleta Tirkî ya îşxalkare teyna PKK nîyo, amanc şarê Kurdî yo. Kotî de Kurdêk bibo, dewleta Tirkî ya îşxalkare fermanê kiştişî dana. Ma sey çalakgeranê Mertalanê Gandaran tewirê hukmatê herêma Başûrê Kurdistanî şermezar kenê.”

Peynîya eşkerayîye de vengdayîş bi şarê Kurdî, bi taybetî ciwanan û ciwananê Başûrê Kurdistanî rê ame kerdene beşdarê çalakîya Mertalanê Gandaran bibê.