Komîteya Amadekarîye ra Nîlufere Koç derheqê çalakîya Strasbourgî ya 15ê sibate de ANFyî rê qisey kerd. 

Nîlufere îfade kerd ke têkoşînê seba azadîya Rayber Apoyî sînorî derbaz kerdê û vat: ‘’No zî mojneno ke polîtîkaya tecrîdkerdişê kurdan a bi sîstemê Îmraliyî şikîyaya. Rayber Apoyî kurdî amadeyê seserra 21ine kerde. Mîyanê nê 26 serran de Tirkîya her hetî ra rîyê tecrîdî ra bin kewte. Tirkîya warê mîyanneteweyîyî de zî teber de ameye verdayene.

Îqtîdarê AKP-MHPyî zî bi tezê Tirk-Îslamî bin kewt. Artêşa tirke ya îşxalkere rixmê çekanê qedexeyan û teknîkê xo zî ha bin kewena. Artêşa îşxalkere bi serran o kena ke herêmanê Zap, Metîna û Avaşîn de cabiba la nêeşkena.

Nika pers no yo; gelo seba Tirkîya rayîrêko bîn est o? Wexto ke merdim hemsengîya Rojhelatê Mîyanênî ercneno hêzêkî vîneno ke tim ser keweno û pîl beno. O hêz zî têkoşînê azadîye yê kurdan o. Alternatîfê kurdan zêde yê. Sûrîye ra dima zî no dîzayn do dewam bikero û rolê kurdan do hîna zaf krîtîk bibê. Di dewletê serekeyî mendî; Tirkîya û Îran. Hetê bînî ra cinîyî, eleweyî mîyanê azadîye û demokrasîyî de yê. Tîya de kurdî est ê ke têkoşînê demokrasîyî yeno kerdene. No têkoşîn hinî nêno bêvengkerdene.’’

Nîlufere bale ante pêvînayîşanê bi Rayber Apoyî ser û vat: ‘’Dewlete ancî şîye verê Rayber Apoyî. Çunke o mefteyê çareserîya meseleya kurdan o. Rayber Apo dewleta tirke rê vano; ‘Ma wirdî zî eşkenê ser bikewê. Oyo ke kurdan rê ameyo kerdene neheqî yo, seba sereraştkerdişê ney zî demokrasî şert o.’ Seba demokrasîyî zî ganî 7 madeyê Rayber Apoyî bêrê caardene.

Emser 15ê sibate de, Strasbourg de rayraşîyayîş û mîtîngêkî bikerê. Ma wextêkê tarîxîyî de yê. Ganî ma azadîya Rayber Apoyî bîyarê ca. Rayber Apo vano; ‘Ez eşkena meseleye bingeyê huqûq û sîyasetî de çareser bikera.’ Rayber Apo qalê demokratîkbîyayîş û çareserîye keno. Eke Tirkîya do qebul bikera do qezenç bikera, qebul nêkera do bin bikewa.

Hinî wext wextê azadîya Rayber Apoyî yo. Rayber Apo eke biwazo eşkeno pêro meseleyan çareser bikero. Erkê ma yo ke Rayber Apo Îmraliyî ra vejê. Ma bi nê mesajî 15ê sibate de Strasbourg de bibê.’’