Komîteya Karanê Teberî ya KCKyî derheqê eşkerayîya vizêrîne ya Mesrûr Barzanîyîde eşkerayîyêke daye.

Eşkerayîya Komîteya Karanê Teberî ya KCKyî wina ya:

''Serekwezîrê Herêma Kurdîstanî Mesrûr Barzanîyî vizêr kombîyayîşê xo yê çapemenîye de raştîyî mîyan kerdî, reş kerdî. PDKyo ke serra 2014ê de êzidîyî destê DAÎŞî de war verdayî  9ê teşrîna verêne de hukmatê Iraqî reyde Şingalî ser o peymanêke kerde û êzidîyî rena eştî binê tehlukeyî.

PKK dima ke êzidîyî xelisna û pawitişê înan rê ardim kerd tebaxa 2018î de bi hawayêkê fermî Şingalî ra vejîya. Pêro dinya bîye şahîdê ney. La PDK û dewleta tirke seba eqsê ci propaganda kerd, xoîdarekerdiş û xopawitişê şingalîjan krîmînalîze kerd.

La heqê êzidîyan esto ke xo bipawê û îdare bikerê. Şarê Şingalî zî nînan wazeno. Ma zî tim paştî daye nê waştişanê meşrûyan û ma do paştî bidê. Şarê Şingalî 9 mengan ra nata vera peymana Bexdad-Hewlêrî çalakîyan keno û wazeno ke peymane nêra caardene. La Mesrûr Barzanîyî bi eşkerayîya xo ya vizêrîne reyna Şingal sey hedef mojna. Xoserîya Şingalî dûştê Kurdîstan û qanûnanê Iraqî nîya. Eqsê ci na do înan hêzêr bikera.

Mesrûr Barzanîyî heman kombîyayîşê çapemenîye de xoverdayîşê PKKyî reş kerd. Mesrûr Barzanî qala îşxalê dewleta tirke yê vera Başûrî zî qet nêkerde. No tewirê Mesrûr Barzanîyî îşxalê tirkan keno meşrû û dano dewamkerdene. Ma reyna anê ziwan ke ganî PDK vera îşxalê dewleta tirke hetê ma de ca bigêro û pê dîyalogan meseleyan çareser bikero.

Hetê bînî ra tay beşê medya yê ke nêzdîyê PDKyî yê, wina mojnenê ke seke mesuldarê şîdet ke çend rojan ra nata  çalakîyanê Başûrî de qewimîyeno, têgêrayîşê ma yo. Kesê ke na propaganda kenê qestî ra şar anê têvera û alozîye kenê giranêr. Heta nê kesî qestî ra kenê ke dewleta tirke Başûrê Kurdîstanî bêîstîkrar bikera û zemînê pêkewtişê zereyî amade bikera. Xora MÎT seba naye peyê xebat û provakasyonan de yo. Ma sey têgêrayîş tim pare kerd ke ganî nê meseleyî goreyê waştişanê meşrûyan ê şarî û bi metodanê demokratîkan bêrê çareserkerdene. Seba çalakîyanê peyênan zî tewirê ma heman o. Vêşnayîşê bînayanê partîyan û bînayanê dezgehan nêno qebulkerdene û no kerdiş têna dişmenanê kurdan rê xizmet keno. Hetê bînî ra ma xebitnayîşê çekan û şîdetê vera çalakîkeran zî şermezar kenê. Waştişê şarî meşrû yê û ganî meseleyî bi hawayêkê demokratîkî bêrê çareserkerdene. Bi na wesîle ma reyna bi xurtî vanê ke çalakîkerî wa bi rayîrê demokratîkî waştişanê xo bîyarê ziwan.''