Badê provokasyonanê PDKyî yê herême têgêrayîşê artêşa tirke zî zêdîya. Bitaybetî saetanê şewe de bi helîkopterê serê Metîna û Heftanînî ra gerenê. Seba ke PDK hêzanê xo yê çekdaran herême de ca keno, teyarayê keşîfî yê dewleta tirke zî zafêr gerenê.

Hêzê pabesteyê PDKyî Kanî Masî, Batufa û Derkarê de nuqtayanê kornrolî nanê ro. Eynî wextî de dewleta tirke heme qilê Heftanînî ke leşkerê xo tede ca kerdî de dormeyê nuqtayanê xo pê dêsan gena û vera çalakîyanê bitesîran ê gerîlayan sîstemê pawitişî yê binê erdî aver bena.

Hemwelatîyê Berwarîyijê ke ajansê ma rê qisey kerd vat: ''Her şewe têgêrayîşê leşkerî yê artêşa tirke esto. Bizanîyîş herême bombaduman kenê. Bi bahaneyê PKKyî hêriş kenê la herêma ma de gerîlayî çîn ê. Hêrişê vera dawa leteyê hêrişê planê îşxalî yê. Hêzo leşkerî yo ke xo tîya ca keno xo sey pêşmergeyan dano naskerdene la ê pêşmerge nîyê. Seba ke xo şarî rê bidê qebulkerdene xo sey pêşmergeyî ramojnenê la şar înan qebul nêkeno. Ma şerê mabênê kurdan qebul nêkenê. Eke wazenê şer bikerê wa kişta gerîlayan de vinderî vera dewleta tirke şer bikerê.''

Hemwelatîyê bînî zî nê wina vat: ''Waştişê înan oyo ke ma bitersnê û erdê ma ra vejê la ma do çirey herra xo cameverdê. Têgêrayîşê hemwextî yê PDKyî û dewleta tirke zirar dano têkoşîn û destkewteyanê kurdan. Ma veng danê PDKyî ke wa peyser binacîyo. Eke mabênê kurdan de şerêk vejîyo, berpirsîyarê nê PDK yo. Pêşmerge zî gerîla zî domanê ma yê. Nika çîyê ke benê leteyê planê tirke yê. Ganî her kes na raştîye bizano.''