Komîteya Perwerdeyî ya Kampa Multecîyan Şehîd Rustem Cûdîyî (Mexmûr) hêrişê dewleta tirke yê çekanê kîmyewîyan proteto kerdî. Verê eşkerayîye semedê şehîdanê Kurdîstanî rêz ame girewtene. Dima ra wendekara bi nameyê Meryeme Bulut eşkerayîye wende.

Eşkerayîye de nê ameyî vatene: ''Dewleta tirke gama ke qisey kena tim vana 'kurdî wayûbirayê ma yê' la caardiş de bê hêrişan kurdî çîyêk nêvînenî. Hem kurdan qir kena hem zî nêverdanê ziwanê xo de dejê xo zî bîyarî ziwan. Dewleta tirke ya îşxalkera ke vera hêzanê PKKyî de bêçare menda dewan vêşnena, kurdan qir kena, hêrişê destkewteyanê Rojawanî kena. Kurdê xayînî zî paştî danê înan. Rixmê heme hêrişan nêeşkenê aver şirê. Coka nika pê çekanê qedexeyan hêrişanê xo domnena. Wazenê pê çekanê kîmyewîyan xoverdayîşê kurdan çîn bikerê.  Ma sey malim û wendekaranê Mexmûrî nê hêrişan protesto kenê û veng danê ke wa heme kurdî vera nê hêrişdan vengê xo vejê.''