Qezaya Bismilî ya Amedî ke mêmandarîya kolonîya leglegan kena û wayîrê fauna û florayêka zengîn a mîrçikan a, bi ameyîşê wisarî leglegî zî hêdî hêdî ameyî. Populasyonê leglege yo ke her serre peynîya menga Sibate de yeno Bismil û hetê şarî ra sey sembolê bereketî û mujdana wisarî yeno dîyene, mudawîmê înan zî ver bi peynîya menga Adare hêdî hêdî ameyî.

‘Mujdandayoxê Wisarî’

Leglegê ke ver bi peynîya menga Sibate yenê û bi serran heman halînî şuxulnenê, halînanê ke verî serê dîreganê elektrîkî de viraştê reyna temîr kenê, bi hejîkan halînê xo kenê saxlem.

‘Sembolê Bereketî’

Leglegê ke bi kerm û heşereyan xo kenê mird erdê Bismilî yo ke tede zîreto awî yeno kerdene rê bifayde yê, bi nê hawayî erdî pawenê, benê sebeb ke erd hîna bibo berdar û naye ra zî hetê şarî ra sey sembolê bereketî yenê dîyene.

Leglegê ke serê bejrayîrê Bismil-Êlîhî de û newala Royê Dîcle de dîreganê berzan ser o ciwîyenê û bi dîmenanê xo yê rengênan dormeyê xo xo rê heyran verdanê, nizdê şeş mengan na herême de manenê û peynîya menga Tebaxe de ref bi ref ver bi Royê Nîlî koç kenê.