Xebat û Bêrîvane merdimê yewbînan bîye. Hema 15-16 serre bîyî ameyî zewijnayene. Welatperwer bîyî, waştêne bibê gerîla. Înan rê kênayêke bîye; Zîlane. Înan Zilane zî girewte û seba ke tewrê PKKyî bibê kewtî rayîr. Labelê ameyî tepiştene. Xebat ame tepiştene. Zîndan de musa ke merasîmê cenazaya Armanc Kerrboranî de Bêrîvane ameye qetilkerdene. Dima ke Xebat ame veradayene tewrê gerîlayan bi. 5 serran ra dima Zîlane zî ameye. Amika Zîlane Rozerîne zî kewte înan dima.

Gerîlayê HPGyî Xebat Bêrîtan serra 1987î de qezaya Kerboranî ya Mêrdînî de dadîya xo ra bi. Serra 2012î de zî tewrê gerîlayan bi. Ma hîkayeyê ci goştarî bikerê:''Mi qijkekîya xo de PKK bi nameyê 'talebe' nas kerd. Keyeyê mi welatperwer o. Serrêka qijkeke de ez û merdima mi Bêrîvane ma dayî zewijnayene. Ez 16 serre bîya, Bêrîvane zî 15 serre bîye. Keyeyê ma ra tewrbîyayîşê seba PKKyî zêde bîyî. Serra 2000î de ma rê kênayêke bîye ma nameyê ci kerd pa Zîlane.

Her ke mi û Bêrîvane fam kerdêne ke ganî ma têkoşîn bikerê, ma pê hesîyayî ke ma domanêke arde welatêkê îşxalbîyayeyî. Ziwan, nasname, kulturê ma esîr bîyî. Ma vat ma Zîlane zî bigêrê û tewrê gerîlayan bibê.Serra 2009î de ma verê xo da koyan. La ma hetê leşkeranê tirkan ra ameyî tepiştene. Înan Bêrîvane û Zîlane vera dayî la ez tepişta. Ez hîrê serran zîndan de menda û Rayberîye hîna başêr fam kerd.

Serra 2011î de mi radyo de eşnawit ke Armanc Kerboran şehîd bi, nê zaf tesîrê mi kerd. Kerboran de merasîmê Armancî estbi. Şan mi xeberê merasîmî goştarî kerdêne û ez musaya ke Bêrîvane ameye qetilkerdene. Bêrîvane tim xeyal kerdêne ke koyanê azadan ê Kurdîstanî de seba şarê xo şer bikerê.Dima ke ez zîndanî ra vejîyaya ez serra 2012î de tewrê gerîlayan bîya. Nika ez eşkena qesasê Bêrîvane û şehîdan bigêra.  Wexto ke ez tewrê gerîlayan bîya mi Zîlane nêarde. Mi vatêne wa xo bi xo bêra. Zîlane zî serra 2017î de ameye, nika koy de ya. Seba mi zaf manadar o ke ez Zîlane reyde koyan de şer kena. Têkilîya babî û kênaye ra zêdêr têkilîya embazîye fîraz a. Waya mi Rozerîne zî xora serra 2014î de tewra gerîlayan bîye.''