Hemserekê PJAKî Sîyamend Moînîyî derheqê pêkê tepiştişê kurdan ê rejîmê Îranî de ANFyî rê qisey kerd.

Qiseykerdişê Moînîyî ra beşêk wina yo:

''Pêlê destbendkerdişê çalakîker, sîyesermedar û cinîyananê Rojhelatê Kurdîstanî çarçewa sîyasetê dişmenîye de yeno kerdene. Îran armanc keno ke çimanê komelî bitersno. Rejîmê Îranî wextê Komara Mahabadî zî tede tim hêrişê kurdan kerd. Kurdî ganî vera nê hêrişan yewîya xo bipawê û vera rejîmî tewirê xo bimojnê. Heta ke şarê ma dormeyê paradîgmaya azadîye de xo rêxistin nêkero no zulmê Îranî do dewam bikero.

Ganî kurdî seba vurîyayîşanê ameyoxî xo amade bikerê û hêzê pawitişî awan bikerê. Seba ke destkewteyê ma destê ma ra nêşorê ganî ma pêro seba berzkerdişê îradeyê komelê Rojhelatê Kurdîstanî wayîrê têkoşînî vejîyê..

Têgêrayîşê ma seba çareserîya meseleyan tim dîyalogî pêşnîyaz kerdî. Meseleya kurdan a Rojhelatê Kurdîstanî meseleyêka sîyasî ya û ganî bêro çareserkerdene. Rejîmê Îranî kurdan înkar keno. Ganî kurdî yewîya xo bîyarê ca û dima têbigêrê.

Rejîm pê her metodî wazeno verê kurdan bigêro. La şarê Îranî û Rojhelatê Kurdîstanî zî hînî nê têgêrayîşê şovenîstî vînenê. Îran de metodê tewr demokratîk îdareyo demokratîk o.

Komel bi hawayêkê pozîtîfî ewnîyeno Hemleya 'Wextê Azadîye yo'. Şar seba azadîye amade yo ke bedelanê giranan bido. Îqtîdar hêzê şarî ra terseno û xîret keno ke îradeyê şarî bişikno.

Nê prosesê hemle de Rejîmê Îranî dest pê hêrişanê hîrayan kerd. Rejîm çalakîker, sivîl, cinîyan tepişeno erzeno zîndanan û bi nê hawayî wazeno çimanê şarî bitersno.No şerê azadîye yo ke çimê dişmenî tersnayê. Îqtîdar nêeşkeno bi terorîzekerdişê komelî payan ser o bimano. Coka komelê Rojhelatê Kurdîstanî xo çend rêxistin bikero ma eşkenê hende lez gaman bierzê û îqtîdar birijnê.''