Endamê Meclîsê Pêroyî yê Mûşî yê HDPyî Savci Arslan û Mehmet Emîn Taşer bi îdîaya 'propagandaya rêxistine' wezîfeyî ra ameyî dûrfînayene. Meclîso ke 25 endamanê ci ra 15ê înan ê HDPyî bî heta nika 10 kesî wezîfeyî ra erzîyayî, 5 kesî mendî.
Wezîrîya Karanê Zereyî yê tirkî Savci Arslan û Mehmet Emîn Taşer ê ke Partîya Demokratîke ya Şaran (HDP) ra Meclîsê Pêroyî yê Bajarê Mûşî rê ameybî vîjnayene, wezîfeyî ra girewtî. Sebebê qerarî zî sey cipêrsayîşê 'propagandaya rêxistine' yo ke derheqê wird endamanê HDPyî de ameyo destpêkerdene, ame ramojnayene.
Meclîso ke 25 endamanê ci ra 15ê înan ê HDPyî bî heta nika 10 kesî wezîfeyî ra erzîyayî, 5 kesî mendî. Endamêko ame vîjnayene seba ke tepişte bi mazbata nêdîyaye ci. Dima ra wezîfeyê Kadere Erol, Fîlîze Aydin, Ceyhane Aydemîr, Sûat Kalin, Mehmet Şakir Tugrul, Mûsa Kaya û Mehmet Demîrî ame destsernayene.
Savci Arslanî ke derheqê qerarî de Ajansê Mezopotamya rê qisey kerd vat: ''Îqtîdarî cayê ke dest nêfînayî wazeno pê qeyûman bigero. Ma na nêheqîye qebul nêkene. Têkoşînê ma yê huqûqî do dewam bikero.'' Mehmet Emîn Taşer zî vat: ''Xebara ma cipêrsayîşî ra çînê bî. No qeraro keyfî yo. AKP seba ke xoser qerar bido hûmara ma dano war. Têkoşînê ma yê cigêrayîşê edaletî do dewam bikero.''
