Dêrsim de kişlaya leşkerî ya ke Terteleyê Dêrsimî de sey qerargehê merkezî şuxilîyabi vurîyaye 'Muzeyê Tuncelî.'

Wekîlê HDPyî yê Dêrsimî Alîcan Onluyî mesele bi vernîyazêk berde rojdemê Meclîsî û waşt ke Hetkarê Serekkomarî Fuat Oktayî cewab bido persanê ci.

Onluyî ard ziwan ke no muze seba ke Terteleyê Dêrsimî bêro mîyankerdene û vîr a şoro ame akerdene. Onluyî vat: ''Wezarê Turîzmî bi vatişê 'na awanîye zengînîyanê ma ra ya' wayîrê Terteleyî vejîya. Nê muzeyî de derheqê Terteleyê Dêrsimî de qet yew çi çin o. Herinda şarî de kiştoxê dêrsimijan tewrê akerdişê muzeyî bîyî. Heta ke dewlete Terteleyê Dêrsimî reyde têrî nêra, dêrsimijan ra efû nêwaza û goranê Seyîd Riza û embazanê ci eşkera nêkera no muze do qirkerdişî rê xizmet bikero.

Onluyî nê persî persayî:

-Muzeyê Tuncelî dewamê înkar û asîmîlasyonî yo?

-Çira nameyê muzeyî 'Tuncelî' yo. Nameyê Tuncelî îsbatê dewamê hîşmendîya qirkerdişî nîyo?

-Wexto ke muze virazîya dêrsimij, rêxistin, dezgeh, rîsipî, hunermend û roşnvîran ra destûr ameyo girewtene?

-Muze de derheqê Terteleyê Dêrsimî û bawerîya Rayê Heqî de eserî estê? Eke çin ê çira çin ê?

-Erdoganî verî vatêne 'ez do nameyê dewlete ser o seba Terteleyê Dêrsimî efû wazena.' Nika bi nê muzeyî qirkerdiş nêno meşrûkerdene?