Grevê vêşanîye yê Leyla Guvene 149, yê girewteyan zî 111 rojan de dewam keno. Dayîke Esmer Yikar a ke 2 lajê ci yê girewteyî grevê vêşanîye de yê, seba ke meyîtî hepisxaneyan ra mevejîyê vengdayîş bi sazgehanê heqanê merdiman ê Ewropa û her kesî kerd ke berpirsîyarîya xo bîyarê ca.

Dayîke Yikare destpêkerdişê de rojbîyayîşê Rayberê Şarê Kurdî Abdullah Ocalan pîroz kerd û vat, “Ez heme girewteyan ê ke hepisxaneyan de bedenê xo dayo verê merdişî silam kena. Heta nika 6 meyîtî hepisxaneyan ra vejîyayî. Gelo pawenê ke bibê 7 meyîtî? Çira kesêk vengê ma nêheşneno. Dinya çira hende bîya kerr û lale. Domanê ma restê merheleya merdişî.”

Dayîke Yikare da zanayene, domanê aye Seyfettîn û Azad hepisxane de yê û vat, “Seyfettîn Hepisxaneyê Bandirmayî de yo û 1’ê Adare ra nata bedenê xo dayo verê merdişî. Lajê min o bîn Azad zî 4 serrî yo ke Hepisxaneyê Amedî de yo. Zextê serê girewteyan dewam kenê. Ez tîya ra venga heme dayîkan dana, wa êdî her kes biwerzo payan ser. Na bêvengîye derdê ma rê dermanê nêbena.”