Namzedê HDP’yî yê ke qezaya Çewlîgî ya Kanîreşî de xebatanê weçînayîşî kenê şarî eleqeyêko gird mojna ci. NamzedÎ merkezê qeza de ber bi ber gêrênê û şinê serdana keyeyan û esnafan. Bongilan de zî ewro do buro bêro akerdene.
Namzedê hemşaredarîye yê HDP’yî yê Çewlîgî Senem Çakase û Hîşyar Ozsoy, Parlamenterê HDP’yî yê Çewlîgî Erdal Aydemîr û Namzedê Hemşaredarîya Kanîreşî Evîn Ozene û Ozkan Bîngol, endam û şaro ke verê banê partîya HDP’yî ya qezaye de kom bîyî de ameyî têhet.
FERASETÊ MA XIZMETÎ ŞARÊ MA YO
Namzedê Hemşaredarîya Kanîreşî û Parlamenterê HDP’yî yê Çewlîgî Erdal Aydemîrî qiseykerdişêk kerd. Namzedanê Hemşaredarîya Kanîreşî qalê şert û mercanê qezaye kerd û ard ziwan ke ê selahîyeto ke wayîrê ci yê do seba menfaet û kara şarê xo bixebitnê.
GUVENE ANORÊ MA YA
Parlamenterê HDP’yî yê Çewlîgî Erdal Aydemîrî zî bale ante serê Hemsereka KCD’yî Leyla Guvene û çalakwananê grevê vêşanîye. Aydemîrî vengdayîş kerd ke sere de yê Leyla Guvene çalakîya heme çalakwananê grevê vêşanîye rê wayîr bivejîyê. Aydemîrî zext û faşîzmê polîsan ê Amedî şermezar kerdî û vat, “Leyla anorê ma ya, şarê ma heme tewir zorîye do bin bifîno.”
SEBA XIZMETÎ SELAHÎYET BIDÊ
Namzedê hemşaredarîye yê HDP’yî yê Çewlîgî Hîşyar Ozsoyî zî ard ziwan ke ê seba ke Kanîreş hîna rindek bo dest ra çi bêro do bikerê û wina dewam kerd, “Seba ke xizmeto ke şima heq kenê ma bikerê, sindoqe de salahîyet bidê ma. AKP’yî welat mehkûme krîzî, vayîye kerd. Cinîyî bazaran ra desttal agêrênê. 1’ê Nîsane ra dima krîz hîna beno xorîn.”
BONGILAN DE EWRO BUROYÊ WEÇÎNITIŞÎ DO BÊRO AKERDENE
Hetê bînî ra qezaya Bongilanî ya Çewlîgî de ewro saet 11.00 de bi tewrbîyayîşê namzedê hemşaredarîya Çewlîgî Hîşyar Ozsoy, namzedê qezaye Ayşe Kaya û M.Siddik Çelikel û îdarekaranê merkez û qeza yê HDP’yî buroyê weçînitişî do bêro akerdene.
