2ê kanûne ra verî Sûr de 14 reyan qedexeyê tevervejîyayîşî ame îlankerdene. Xoverdayîşê Sûrî ra Rozerîne Çubuka 16 serre û Çekwar Çubuko 16 serre hema zî vîran de yê. Çekvar pêkewtişêk de birîndar bibi la seba ke polîsan asteng kerd nêwedarîya nêweşxane û merd. Rozerîne zî 8ê çeleyê 2016î de taxa Fatîhpaşayî de sereyê xo ra guleyêk werd û ameye qetilkerdene. Keyeyê ci cenazaya Rozerîne 6 mengan ra dima girewte.

Hêlîne Şena 12 serre zî 10ê teşrîna verêne de roja diyîne ya qedexeyî de wexto ke şîyêne firin pê 3 guleyanê wesayîtê zirxînî sereyê xo ra birîndar bîye û merde. 

Dadîyanê Çekwar, Rozerîne û Hêlîne rixmo ke gêrênê edaletî faîlî nêdîyî.

Dadîya Rozerîne Fahrîye Çukur vat: ''Ma 6 mengan nêeşkê cenazaya Rızerîne bigêrê. Sûr seba ma ercîyaye bi. Hema zî qedexeyî dewam kenê.  Înan Sûrî ser o planê pîlî kerdî. Kamî Sûrî vist na rewşe? Ma 6 mengan şew û rojan şîn kerd. Heqê çewî çin o ke ma rê wina zulm bikero. Domanê ma mîyanê betonan de heps bîyî; vêşanî, têşanîye ra pê vêşayîşî merdî. Tay keyeyan hema zî cenazayê xo nêdîyê. Tay ciwanî goristanê bêkesan de defin bîyî. Faîlê Rozerîna mi nêdîyayî. Dewlete kênaya mi qetil kerde. 5 serrî nê 50 serrî zî derbaz bibê ez nêeşkena nê dejî xo vîrî ra bikera.

Sûr de merdimayî ame qetilkerdene. Berpirsîyarê wêrankerdişê Sûrî kam o? Sûcê merdiman çi bi? Kesê ke ameyî qetilkerdene pêwa keyeyê xo yê rijnayî tewrê Çemê Dîcleyî bî. Sûr de merdimayî ameyî qetilkerdene. Ma hacet nêbî, ma însan bî. La ma ameyî kiştene. Ca û wareyê xo ra ameyî koçkerdene. Eke merdim biyêne, hende zulm nêkerdêne. Helbet ma do rojêk  bimirê la ganî neslê neweyî nînan xo vîrî ra nêkerê û nêdê xovîrakerdene.  Eke  ê nê çîyan xo vîrî ra bikerê û bidê vîrakerdene ma heqê xo helal nêkenê. Ganî hesabê Sûrî bêrpo perskerdene."

Dadîya Hêlîne Nazli Şen zî vat: ''5 serrî  vîyartî. Dewlete kiştoxan zanena la reyna zî hukm nêkena. Xîretanê ma ra 4 serran dima mehkeme ameye akerdene la înan hukmkerdiş vindarna. Ez do gonîya kênaya xo erdî ra nêverda. Ez wazenê êyê ke kênaya mi qetil kerde wa hesab bidê. Heta ke ez weş bimana ez do hesabê naye bipersa. Ez 5 serrî yo kerraya gorê kênaya xo dir qisey kena. Ez pê edaletê înan bawer nêkena.''

Dadîya Çekwar Çubukî Netîce Çubuk vat: ''Se kenê wa bikerê la ê do nêeşke bikerê ke ma kerdişanê Sûrî xo vîr a bikerê. Ma do tim wayîrê vîrameyîşê Sûrî vejîyê. 5 serrî vîyartî la ma helêke zî çîyêk xo vîr a nêkerd. Hînî wa dadîyê bînî mebermê, şîn nêkerê. Çekvar zî embazê ci zî do tim vîrê ma de bibê.''