Hemşaredara qezaya Yenîşehîrî ya Amedî Belgîne Dîkena ke dest nîyabi wezîfeyê ci ser û herinda ci de qeyûm amebi tayînkerdene ANFyî rê qisey kerd.

Dîkene ard ziwan ke îqtîdar têna şaredarîyan nê pêro welatî bi rejîmê qeyûman îdare keno û vat: ''Beno ke ê nika dest nanê bînayan ser la qetî nêeşkenê bibê wayîrê îradeyê şarî. Şarî tayînkerdişê qeyûman tesdîq nêkerd. Şarê ma bi rayanê xo, bi wayîrvejîyayîşê îradeyê xo ney mojna.''

Dîkene vist vîrî ke wexto ke reya diyîne ê weçînayîşan de ser kewtî, înan dî ke qeyûman zerarêko pîl dayo. Dîkene vat: ''Dezgehanê ma yê cinîyan ra bigêrê heta keyeyanê serweşîye her ca de qeyûmî ameybî cakerdene. Rewşa nikayêne de teda û zorbazîye reyna yena kerdene. Seba ke bi metodanê zorbazîye nêeşkenê netîce bigêrê vera partîya ma û sîyasetmedaranê ma sûc kenê.

Wexto ke ma newe ra dest pê wezîfeyî kerd xîret kerd ke her warî de şarî de pêbikerê. Ma çarçewa biranê endaman ê Meclîsê Şaredarîye de dest pê vurîyayîşan kerd. 6 mengan ra dima reyna qeyûm ame tayînkerdene. Şarî hînî zanayêne ke vera qeyûmî wurzo we û wayîrê îradeyê xo vejîyo. Beno ke ma tepişîyayî, keyeyan de heps mendî, mehkeme dewam kena la ma tim şarê xo hetî de yê. Ê eşkenê qeyûman bînayan rê tayîn bikerê la nêeşkenê îradeyê şarî rê qeyûman ferz bikerê.''